Sjweitberg (onder ps. G. Rapaille)

[p. 45]

Wie e bietje sjtad gehuert, hat auch Sjweitberg e nès kunstenaers en ‘die zint nog gekker es ich’ meint Feel. Die hoeze in ouw geboewer woë Sjweitberg zich nog genne raod mit wèt of ‘die v'r höbbe vergaete aaf te braeke’ meint Feel. Om zich oet te röste - dat kint auch sjmurgesvreug ziën - zèt dat kunsvolk zich biej Sonya, die gewoon Sonja heisjt, artistiek lank is, donker en good bedeild en die vingt dat d'r naam Aetcafé Sonya nèt get mië hat es gewoon Sonja.

Om zichzelf en angere te peste geit d'r Feel dao auch waal ins in en oet. Aeve get vreigele mit d'r Alex, dae onbegriëpe bilder sjniet oet mergel en te sjwaor beer zuup. Feel daagt 'm gaer oet om te sjake, want hae hat ins gelaeze dat Marcel Duchamp dat auch deeg in ziene onbegriëpe tied en d'r Feel dinkt dat hae dèk auch neet good begriëpe wuert. Este zits te sjake haste trouwes alle tied om dich sjtil, mè gölzig de goodgezaegende Sonya te besjnautse.

[p. 46]

D'r Sjiëm van Murge

- Al ins in Sjweitberg, in de Vleisjsjtraot biej Wullem tiedsjrifte bekiëke, of bie de sjtasie? Man, in dizze tied van innovatie, glietsjte oet uever inspiraties, ambities, transpiraties en nuj blaar, blaedjes vuer jonges en maedjes, potluj, perrepluj, mansluj en vrouwluj! En 't klöksjke tikt wiejer. Blaar? Blaedjes? Dat is banaal woërdgebroek. Minstens neumt me dat op huj: tiedsjrif. En noe ister al wir e nuj tiedsjrif oet. Pardaon, op d'r maert, mot ich zegke. E nuj tiedsjrif uever kuns en kultuur in de zuudelikke regio's. D'r Sjiëm van Murge, heisjt 't. D'r Sjiëm van Murge... oetgeveurd in glansdrök mit enne prechtige bronsgreun glossy omsjlaag en dao op in knalgael mit paars: d'r Sjiëm van Murge. Wat enne apaarte titel! Wat enne apaarte tiedsjriftitel! 't Dink kump oet in Innighaove en wuert exclusief allein mer in Sjweitberg verkoch. 't Geit ins in 't kwartaol versjiene en sjteit onger de houfdredaksie van Mevr. Drs. Twanneke Vos. D'r Sjiëm van Murge! Wat enne integrerende titel! Tiedsjriftitel! 't Nulnummer is waanzinnig sjitterend verzörgd en sjteit vol mit boeiende en hiële interessante sjtökker. Pardaon: artikels. En keigaaf en heaven-heavy foto's. 't Thema! Man 't thema van dit nulnummer is: d'r tied van huj! Wat e waanzinnig sjterk gekaoze thema vuer 't iësjte nulnummer van e nuj tiedsjrif! Neet dan? Miljaar, die foto's zint ech sjiek. Persuenlik ving ich de serie van e saort operazangeres 't sjiekste. 'n Serie, get wie e fotoverhaol. Op de iësjte foto sjteit de zangeres taege häöre eige sjiëm aan te zinge. Op de volgende foto's kommandeert ze zingentaere 'n sjtasieklok om te wieke, achteroet! Teruk! Aaaagh, dat mot me toch kinne. Zoë fotografere dat dat duudelik wuert. En ze zingt wiejer. Die klok nao enne ummer deeper gaonde gank in! Wae good kiek zuut dat de wiezers teruk gont... teruk motte!! Leef lecturiste, dat zou ich uch gaer laote ziën! Zuuste 't vuer dich? Fascinerend! Waanzinnig fascinerend om 't mer ins richtig in 't plat oet te drökke. 'n Operazangeres die prebeert meisteres uever d'r tied te ziën! (Teminste, dat haol ich droet.) 't Houfdartikel geit zoë te ziën vuer vas ‘Sjiëm-sjpeciaal’ heisje. En in dit iësjte nulnummer geit dat uever os bizar gesjravel en gegraansjel om zelf-opgewórpe berg te beklumme... Pak dich dat ins! Klumme en kleddere op oos mederne laevesgebieder wie werk, werk, en nog ins werk!

[p. 47]

Ongerwies, werk, oetgaon, werk, oetgaon, werk en oetgaon en zoë. Huh, de houseparties waere drin gesjetst... woë pölle de pauw sjpiële en kuukes vuer haan kandidere en smarties auch neet in de heng sjmilte. Ozze tied en de vraog of dae waal richtig tikt. Mè dat waor iëder toch auch al of neet? D'r roëje draod van dit houfdartikel is 't ‘Zich angesj vuerdoën en 't persé get te bijje wille höbbe’. Es ich 't teminste good begriep, dit artikel van - natuurlijk - Twanneke Vos. D'r mederne miensj wilt zich zoë good meugelik verkoupe, sjrief ze. En daorom mot hae zich zoëväöl meugelik aansjaffe, vingt ze.

Zuuste 't vuer dich? Dat is bienao filosofisch! D'r Sjiëm van Murge is e tiedsjrif mit durf! Wrief in e sjpiksjplinternuj tiedsjrif dien sjpiksjplinternuj laezers mer ins onger de naas dat ze zich zoëväöl meugelik zint aan 't gelle om zich zoë good meugelik te kinne verkoupe! Groëte kans daste neet lang get verköps omdat 't ze neet naast. Wae gölt zich noe zes-en-nuegetig bladzieje potensjeele zelfkritiek? Doe? Dich? Dat ‘zich angesj vuerdoën’ en ‘persé get te bijje wille höbbe’ kump op bienao eeder bladziej teruk. Op allerleise menere. Uever d'r grujjende groep manskaels die op ge werk, in g'n sjtraot en in vereiniging of kafee versjiene es ‘Champions of Love’. Uever d'r nog altied neet oetgegrujde groep vrouwluj die zich ongerei vaere klauwe om behauve pauw auch nog Miss Wipkip te lieke. Uever allebei os gesjlachte es multi-aktieve-funktionarisse op 't vlak van ‘sjoën waer’ en ‘kale behèj’.

D'r Sjiëm van Murge nummer-nul vertèlt neet persé get nuujts, mè wie ze 't hiej toch op e riejke zètte!? Dat kin ich allein mer bewondere. Good zoë, Twanneke Vos! Want ich höb 't gaer ins allemaol op e riejke en wae neet? En nog get! Dich zelf in de aanbieding doën (mit of zonger korting), dich zoë good meugelik verkoupe in dizze prostituabele tied, dao geit auch e artikel van d'r Vlaamse kant op in. Van de hand van Prof. Josse Amelang. Verrekdes interessant. 't Is ech get te lank om d'r hiej lang uever te vertèlle. Mè 't artikel wuert opgeseerd mit zoën apaarte sjtripteikeninge dat ich die toch mot probere get te sjildere. Sjtel 't dich ins vuer!: Mozes hauverwaegs d'r berg. Mè wat vuer enne berg? Wekkers! Tiktak. Enne berg van wekkers in doezenderlei oetveuringe... taorehoëg. Taorehoëg? Taoreshoëg! Tiktak!

[p. 48]

Volgende sjtrips: Bie de veut van d'r ouwe Mozes sjtont twië monitors woëop de tiën gebode digitaal sjtont te flikkere! Flikflak! Mozes zelf hink vol mit oere, om erm, bein, inkele, oëre, naas, haus, op pishuegte - smiksmak - horloges, horloges, oere, zegk mer. Huerste 't vuer dich? Klikklak! Dan sjteit hae, Mozes-zelf, mit in zien linkse hand - wat sjattig - zoëne ouwerwetse zandluiper en in de rechse e sjtartpistool! Tsaktsak! Want dan wuert 't ech sjpannend. Onger aan d'r berg sjteit zie Mozes-volk, hypermodern. Väöl hane- en pauwe-vaere. Eine groëte durgein, zoë wie v'r einmaol zoë zint. 't Insigste wat v'r gemein höbbe zint de sjtartnòmmere, allemaol nul. En v'r höbbe auch allemaol e deenblaad in de heng vol sjliemsjlekke en auch allemaol, aan de veut, balsahoute klompe... En v'r kieke allemaol aeve gölzig op nao 't sjtartpistool. Geit 't aaf of neet, zuuste os dinke. En op de volgende bladziej geit 't dan aaf. Paaf!

En dao moste os ins ziën renne! Renne! Zoste mit balsaklompe uever 't water kinne loupe? Renne! Durg de kontoere van de teikeningsjkes haer, esof ze van elastiek zint, mè die blieke of sjiene zoë poreus wie potloëd... 't Mozesvolk rent, vaegt, bíést esof os laeve d'r vanaaf hingt. Sjitterend!... Waanzinnig! En woë rén v'r op aaf?

't Nul-nummer van d'r Sjiëm van Murge zal gek ziën.

D'r eine is d'r angere neet en es d'r eine d'r angere waal is.
is d'r angere d'r eine en da wet dalik d'r eine
van d'r angere neet wie laat 't is.

[p. t.o. 48]

[p. t.o. 49]