Sjweitberg (onder ps. G. Rapaille)

‘Ozze Vader Piskapel, oet 't gesjlach van Daniël. Daniël de kiekerdekiek, loezebroëd is Ame.’ Dat baede ze in Noord es deprocessie langs kaom. Volges Feel, dae waal mië vesjkes kint die ech typies Sjweitbergs zint, mè diegei miensj oëts hat gehoërt. Väös van Scoen Blazoen neumt 'm neet vuer nieks d'r Willie Alfredo van de Marijkelaan. En da zaet Feel gieftig dat hae al enne ieëw in G'n Sjprung woënt, woë ze noëts zoën sjliemballe zint gewae om 'n laan Marijke te neume, nao e erm kind dat, est 't doe zou ziën komme kieke, altied mië buim zou telle es datter sjtonge. D'r Väös liët 'm da oetkalle en wrief 'm fien onger de naas dat honderd jaor in G'n Sjprung woëne neet wegvaegt dat hae oet de Marijkelaan kump, woë vreuger alle blage mit kaal köp rondleepe omdat dao mië luus waore es blaar aan de buim. En dat dat nog waal aeve get angesj is, es daste ongelökkig neet good kins kieke.

Da geit d'r Feel aeve pisse. Da kump d'r Feel teruk en da zaet hae dat hae waal zal wachte tot Elly in d'r café is, want die mot hae nog get belangrieks vertelle. En da hilt d'r Väös de moel.

[p. 67]

Erotiek

- Sjoën waer. De bel geit. Es biej mich de bel geit en ich huer toch eine 't hoes in komme, da kint dat mer eine ziën: mien naef oet Sjweitberg. Pratsjt zich neer, kort biej de Aelsflesj en zaet: ‘Wat dinkste worom 't zoë drök is in Mestreech?’

‘Mestreech’, zegk ich: ‘Dao is 't toch ummer drök mit die winkels.’

‘'t Is drökker’, zaet miene naef en kiek mich aan esof ich d'r kop los höb.

‘Hiej!’ Hae wurp folders op de taofel. Van de Rieks Universiteit Mestreech. Die zint bezig mit erotiek.

‘Ao, interessant’, zegk ich. ‘Ich wis neet dat ze dat dao auch al besjtudeerde.’

‘Besjtudere? Laot mich neet lache! Vetzakkerie! Wetste wat dat is? 'n Deftige meneer om uever de vot te kalle van os belastingcente!’ Ich ziën noe pas wie opgereegt hae is. Hae vaegt zich 't sjweit van 't gezich en mak zich de kervat los.

‘Zoëwiet is 't komme. Dat viër kinne opdrië vuer de hobbies van de dames en hiëre van Mestreech! Hiej!’ Hae sjmiet mich 'n gezet vuer mien naas woë e paar advertenties omcirkeld zint. Hulp in de hoeshouding, kingeroppas en zoëget!

‘Wat mot ich dao da mit?’

Hae kiek mich aan esof ich ziene jongste bedeende bin.

‘Dat zint ze!’

‘Wie, dat zint ze?’

‘Dat is allemaol volk wat op de Universiteit wirkt. Die verkleije zich es gewoon luj, zette zoën advertenties en vuerste 't wets, meinste daste vuer ze wirks, terwiel zie dich oet de kleijer kalle en dich ongerzeuke. Wat menste wat zich dao op meldt? Vrouwluj. 't Gros gesjeijje, die kinne get extra's good gebroeke. Ich höb die in de gate.’ Mit väöl misbaar legkt hae mich oet dat gesjeije vrouwluj enne risicogroep zint, dat e bietje risicogroep vuer de Universiteit automatisch doelgroep is en dat daomit geëxperimenteerd wuert en ongerzeuk gedaon.

‘Nao...’, probeer ich: ‘Die zint toch te oud om nog dökterke te sjpiële.’

‘Onnuezele! Laes die folders da! Wae laeze kint, mot toch ziën dat dat allemaol truuksjkes zint... om 't ins lekker

[p. 68]

druever te kinne höbbe. Is hiej dan nieks mië heilig?’ En hae wies mich op 't programma: ‘Erotiek en reclame. Lezing met filmbeelden’.

‘En wat dinkste dat dat is? Dao hoof ich neet vuer d'r haer te gaon. 'n Bloëte tant die dich natuurzuuvere paeresjroëp perbeert aan te sjmire!’ Nae, miene naef hooft da noëts geine paeresjroëp mië.

‘'n Bloëte vot mit e bananeröksjke drom haer en gank zoë mer durg. Da moste toch verekke van d'r honger wilste nog oëts 'n banaan aete.’

Ich perbeer 'm mit gepaste vuerzichtigheid oet te legke dat 't allemaol get ueverdriëve is. Zoëget mot me toch kinne relativere. Relativere? Dat haw ich neet motte zegke. Hae wuert mich toch gieftig, maakt zich de knuip van 't humme los en sjrieëft dat ich die goor bende auch nog 'n hand baove d'r kop perbeer te houte.

‘E blind paerd biste, dao, laes da! Doe bis zelf ein van de ongerwerpe. Erotiek en Bataille.’ Wat? Ich laes...

‘Nae, nae, nae, dat zuuste verkiërd, naef. Dat is ozze franse nonk, dae is al jaore doëd en dae hat inderdaad waal ins get gesjriëve en dao zulle ze 't da waal uever gaon höbbe.’

‘Ao jao, en doe liës zoë dien femilie durg d'r drek haole?’

‘Na, 't is toch auch dien femilie!’

‘Mien femilie? Nieks derva!’

‘Mè jòwaal, die mam is 'n zuster van mien mam en mien mam is getrouwd mit d'r pap ziëliger en dat is enne nonk van dich en dae nonk, miene pap dus, is enne broor van d'r franse nonk en doe bis naef va miene pap en va mich en ich bin naef van dich en van d'r franse nonk dus bistich naef-naef van d'r franse nonk, zoë wie ich naef-naef bin van diene nonk-nonk dae in 't Belsj die sjtriptaese-tent hat.’

‘Dat is gein sjtriptaese-tent! Dat is 'n animeerbedrief en trouwes mit dae nonk höb ich gaar gei kontak. Dae ziën ich allein af en toe es hae mie nichsjke kump haole.’

‘Nichsjke?’

‘'t jongste van tant Eva. Dat is 'n zuster van miene pap zien iësjte vrouw-vrouw die 'm d'r tössjenoet gekniëpe is mit ziene broor-broor en dat maedje wirkt af en toe biej 'm.’

‘Wae?’

‘Dat nichsjke.’

‘Nou frissje femilie höbstich.’

[p. 69]

‘Dat is auch femilie van dich. En trouwes, 't Daphne wirkt dao mer drie aovende in de waek.’

‘En woë laeft dat vuer d'r res da van?’

Naefleef kiek op de oer: ‘Got, is 't al zoë laat? Jong, ich mot weg. Pis wir ins.’

‘Ich vroog woë die Daphne vuer d'r res va laeft?’

‘Wie mot ich dat weite? Ich ziën die mer e paar kiër per waek es ze mich get oethulp.’

‘Zo...enne?’

‘Neet wastich dinks, dubbele. Gewoon lich kentoërwerk en daomit basta! 't Betste!’

Weg is mie naefke. D'r bolide sjnäört de sjtraot oet. Zien aelske! Ich drink 't zelf mer laeg. Missjiens dat ich 't auch ins mot gaon höbbe uever erotiek.

Pak baorwater estich 't kruuts juekt.