Het gulden cabinet van de edel vry schilderconst

[p. 173]

Lyck-sangh,

Stemme: Le flots n'auront point de rigeur, &c.

DE jammer klacht doorscheurt mijn hert
Die uyt ghestort wordt door de sangh Goddinnen
En vande Zeese Mereminnen,
Met droef gheschrey en over groote smert,
Inden verbolghen Oceaen
Daer al de water Goôn verslaghen staen,
Om dat de Son nu is verduystert
Van Pictvras kracht,
En haeren glans ontluystert,
Die dit graff versmacht.

ICk sien de aert in't swert becleet
Met druck bevanghen soo veel trouwe vrinden
En vrome gheesten die hem minden
Om dat hy was kloeck Schilder en Poeët,
Den eersten Soon van d'eel Pictver
Vol soeten gheest, met naem Bonaventver
Die ons op d'Aert-rijck heeft ghegheven
Van sijn Const een deel
Jn schijnsel van het leven
Door Pen en Pinceel.

WAt treurt ghy Vrinden vol verdriet;
Staeckt uwen druck en wilt u wanghen drooghen,
Vaeght af de tranen van u ooghen
En gunt ghy uwen vrindt den hemel niet?
Den roem van sijn onsterflijckheyt
Sal altijt leven inder eeuwicheyt,
Al leyt sijn lichaem hier begraven
En vergaen in slijck
Sijn deughdelijcke gaven
Sijn in't Hemel-rijck.

EYNDE.