Hendrick Andriesens
ghenoemt Mancken Heyn. Schilder van Antwerpen, ende ghestorven in Zeelant in't Iaer 1655.
AL ist dat den Naem van Mancken Heyn aen een jeghelijck verachtelijck sal duncken te wesen, ende my sullen willen beschuldighen van botticheyt uyt dien Mancken Heyn schijnt eenen naergheworpen naem te sijn ghelijck ick oock oordeel, doch ter wijlen hy selver niet en schaemden sijn Constige stucken met soo daenighen Tijtel te teeckenen, soo en hope niet te misdoen, uyt reden oock hy by de Lief-hebbers alsoo bekent is, ende al ist dat den naem schijnt manck te gaen, soo en gaen zijn Const-rijcke Schildrijen niet kreupel, want alle de stilstaende dinghen die hy met groot verstant gheschildert heeft worden in groote weerde ghehouden, door de netticheyt en levenden aert, die daer in te sien zijn.
T' Pinceel van Mancken Heyn heeft soo veel voorts ghebracht,
Dat sy niet om den naem, maer wordt door Const gheacht:
De daet bethoont het werck, het werck verheft den Naem
En blijven allebeyd' onsterff'lijck by de Faem.
Auteursrechtvrij