Lucas ende Cornelis de VVael
Ghebroeders ende schilders van Antwerpen.
LUcas de Wael heeft in sijn jonckheyt gheleert by den vermaerden Schilder Jan Breugel, daer hy soo heeft aenghenomen ende sy selven soo beneersticht om de uyterste cracht der Schilder-const te vatten, dat hy in zijnen jonghen tijt Vranckerijck ende Jtalien heeft doorreyst, alwaer hy veel fraey Landtschappen in Fresco als oock in Olie-verf heeft ghemaeckt, die by de Liefhebbers seer ghesocht ende gheweerdeert worden om hunnen lossen aert ende soete verschieten die sy hebben, zijn rotsen ende gheberghten met hunne bewassen schommen, en fraey water-vallen, stercke voorgronden, en nette ghetempeerde lochten, sonne schijnen en weerlichten, en connen niet verbetert worden midts sy met groote studie ende vlijtighe opmerckinghe van hem gheschildert sijn ende noch daghelijckx worden ghehanteert binnen Antwerpen plaetse van zijn wooninghe, zijnde nu oudt 69. jaren.
Sijnen Broeder Cornelis de Wael is oock een vermaert Schilder wiens, beyder Vader is gheweest Jan de Waele, die in't jaer 1633. is ghestorven oudt 75. jaren daer ick in het eerste deel af hebbe gheschreven. Desen Cornelis is eenen uytstekenden gheest en Const-rijck Schilder in cleyn Historien, Batalien soo te water als te landt, en besonder in opbrekinghen van Leghers, in refressen der Soldaten en dierghelijcke actien, die seer grooten welstandt hebben en wel uytghehaelt sijn met het Pinceel sijnder Consten, het welck Hispanien ende oock heel Jtalien tuyghen can daer sijn wercken in groote achtinghe ende voor selsaem ghehouden worden, alwaer hy veel gheschildert heeft, namentlijck voor sijne Majesteyt van Spanien Philippus den III. als oock voor den Hertogh van Aerschot doen ter tijt in Spaignien wesende: is noch in't leven ende woont te Roomen oudt 68. jaeren.
Wie can mijn ghesicht bedrieghen
T'waer door Const van toovery
D'oogh en can nochtans niet lieghen
T'gen' men siet in d'eel schildry
Die de Wael ons compt verthooghen
Daermen op een cleyn Panneel
Siet verschijnen voor de ooghen
Wonder wercken van t'Pinceel.
Crijghs ghewoel vol vremde strijen
Daermen niet als dooden telt
Oft des Leghers pesterijen
Die eerst comen uyt het velt
Daermen t'oorloghs volck siet trecken
Naer den slach oft guarnisoen
Dat can ons de Wael ontdecken
Dat can sijn Pinceel al doen.
Auteursrechtvrij