Lucas van Uden
Schilder van Antwerpen, gheboren den 18. October 1595.
OM te bewijsen dat Lucas van Uden een vande vermaerste gheruchtbaerste ende weert befaemde Landtschap Schilders is van desen tijt, die niemant door sijn dommelachtighe ende soete handelinghe inden welstant van boomen, gronden, verschieten, lochten, en al het ghene daer toe versocht wordt, naer het leven met goeden aert ende verstant af te belden, en hoeft te wijcken, den welcken teghenwoordich binnen de Stadt van Antwerpen sijn woonplaets is houdende, soo heb ick goet gedocht tot sijnen meerderen lof ende onsterffelijcke eer dit volghende rijm-schrift aenden Weet-lievenden en Const-soeckenden Leser voor ooghen te houden behelsende de uytghesonderste lessen oft reghels die een ervaren Landtschap-Schilder in sijn verstant behoorden aen te teeckenen ende sijn Const naer de maet der selver uyt te wercken ghelijck Lucas van Uden met eenen cloecken gheest is doende.
Die een Lantschap wilt gaen stichten
Moet het levens aert besichten
Moet gaen buyten naer het wouwt
Daer het groen gheloovert hout
By de blau en hooghe berghen
Can de oogh der Schilders terghen
En t'ghebeckt musijck daer by
Thoont daer sulcken melody.
Dat sy qualijck connen rusten
Door de aenghedreven lusten
Die hun gheeft den soeten tijdt
Midts hy t'Schilders gheest verblijdt.
Den blom-rijck cortnachtsten somer
(Vyandt vanden swaeren Droomer
Die de langhe slaeplust mint)
Js des Schilders besten vrint:
Die haer wesen af gaen belden
Jnde groen bewassen velden
Die vroegh met Avror' opstaen
En naer AEstas wooningh gaen,
Daer t'ghediert seer vrolijck huppelt
T'gras is vanden dau bedruppelt
Daer de claerheyt vande Son
Spieghelt haer in beeck en bron.
Daermen siet t'Palet bereyden
En de verven onderscheyden
Daermen schildert t'Wout soo naer
Oft een groene wereldt waer.
Ceres met haer rijpe aren
Ops met al haer groene haeren
Tellvs oock soo vlijtich pronckt
En het Schilders oogh belonckt
Met haer onghebonden vlechten
Die des' Const hier op siet rechten
Thoont haer wesen al soo bly
Om te staen in d'eel Schildry.
Door t'vermind'ren en vercorten
Sietmen dese Const uytstorten
Door het soet en veer verschiet
Anders waer de Const al niet.
T'voorwerck doet t'verschiet verdwijnen
Schoon door helle sonne schijnen
En verciert oock boven al
Met Fonteyn oft water val.
Somtijts door den reghen vochtich
Door het onweer donckerlochtich
Auteursrechtvrij