Ian van Bockhorst
Ghenoempt Langen Ian, Schilder van Munster.
GHelijck noch veel jaeren inde memorie der menschen sal blijven het lanck ghewenscht gheluck dat ons de Stadt van Munster heeft ghebaert door den vasten ende onbrekelijcken vrede ghesloten tusschen de Machtighe Croon van Spanien ende Hollant, die in dese Princelijcke Stadt tot blijdschap van alle Borghers, tot welvaert van het Landt, tot meerder deught van alle geestelijckheyt, tot troost der benouwde en bedruckte herten, tot rust van het buyten volck, tot hulp der vremdelinghen, tot al-ghemeyn profijt ende tot nederlegghinghe van alle bloetstortinghen is opgherecht (daer wy de vruchten af ghenieten) den 5. Junij in't jaer 1648. ghelijck tot ghedachtenis niet qualijck daer op en past dit tijdt-schrift oft Chronicon.
Inter hIspanIae regeM & VnItas proVInCIas
paX InIta qVInta IVnII DenVntIata.
Soo ist dat de voorsz. edel Stadt van Munster oock wel roemen mach op haeren jngheboren Jan van Bockhorst van eerlijcke en treffelijcke Ouders, midts redenen dat hy door zijn groote wetenschap inde handelinghe van Pictuer niemant in dese eeuw en hoeft te wijcken; want de netticheyt, suyverheyt ende vaste ghesteltenis (die de deughden der Schilder-const zijn) daer in te sien is. Daer menich Princelijck Cabinet ende loffelijcke Kercken soo tot Antwerpen als andere Provintien van versien en ten hooghsten opghepronckt zijn. Die niet alleen ervaren en is in treffelijcke ordonnantien, in costelijcke Tafereelen uyt te wercken met soo grooten cracht ende stercke handelingh als van Dijck oft Rubbens oyt hebben connen doen, maer wort oock in conterfeyten ghehouden voor een vande alderbeste Meesters diemen teghenwoordich jevers te Landt can vinden, soo dat segh ick de handeling van Langhen Ian, noch langh by de wereldt sal bemint ende om haer Const ghesocht worden die gheleert heeft by Jacques Jordaens.
Die thoont het gen' hy is door cracht van edel Consten
Die sietmen vande Faem verheffen en bejonsten
Die langh ghedenckt, schoon dat de Const al dickwils lieght
Ghelijck de doode verf het leven wel bedrieght.
Dit comt in Langhen Ian hier metter daet te blijcken
Die noot door sijne Const en schijnt Natuer te wijcken
Want niet soo crachtigh ons Natura thoonen can
Oft t'wort met doode asch verthoont door Langhen Ian.
Auteursrechtvrij