Cornelis Poulenbourgh
Schilder van Vytrecht.
EEnen vande gheruchtichste van desen tijdt is Cornelis Poulenbourgh, gheboren van Uytrecht, seer ervaren om met de Pinceel in't cleyn te schilderen soo figuren als beesten, en besonder naeckte kinderkens, soo bisaert en fraey oftse eerst inde bakermat door de Voesters wel ghetroetelt ende gheviert waren, soo mals, poeselachtich, swirich en los staen hun vollijvighe lichaemen, soo wel ghestelt en vleesachtich ghehandelt, dat de natuer geen volmaeckter schoonheydt in't leven en can voort brenghen als Poulenbourgh met zijn Pinceel weet aff te belden: hy is oock seer gheestich in ruinen, lantschappen en verschieten, die by alle Const-kenders in groote weerden ghehouden worde. Sijnen uytstekenden gheest en was oock niet vernoeght, ende in rust ghestelt voor hy en had de school van alle Consten (dat is Roomen en meer vermaerde plaetsen van Jtalien) besocht daer hy langhen tijt dese treffelijcke Const gheoeffent heeft, ende van veel Cardinaelen en edel Heeren wert besocht om de mirakelen vande Natuer door zijn Pinceel dadelijck te sien uyt belden. In't jaer 1637. heeft den Coninck van Enghelant (door zijn edel handelingh aenghelockt zijnde) hem naer Londen ontboden, alwaer Poulenbough tot groot contentement van het heel Hoff veel Tafereelen ende andere nette wercken heeft ghemaeckt tot dat den lust hem dreef naer zijn voorschreven gheboort plaets, en woont noch teghenwoordich tot Uytrecht.
Ghelijck de waere deught verheft des menschen Naem,
Soo wordt de Schilder-const vervoordert door de Faem.
De Faem is rechte spor' om jemant aen te wack'ren
Die neerstich met Pinceel doorploeght Picturas ack'ren,
Ghelijck als Poulenbourgh, die soo de Const ontdeckt
Dat Fama noyt en swijght, maer van sijn wercken spreckt,
Van al sijn schoon landauw en beestjens wonder crachtich,
Van naeckte Kinderkens seer mals en pouselachtich
Vol cloecke aerdicheyt, soo dat Natuer niet gheeft
Of t' is daer in te sien, en schijnt dat t'leven heeft.
De stadt van Roomen heeft dit oock al langh gheweten,
Alwaer hy open vont den schat der Const-secreten
Die hy aen Enghelant oock heeft veropenbaert
En daeghelijcks bethoont noch sijnen cloecken aert.
Auteursrechtvrij
