Het gulden cabinet van de edel vry schilderconst

[p. 297]

Michiel Angelo de Batailli
Italiaenschen schilder.

DIe liever hoort t'verhael van vremde oorlooghs strijen
Als wel de daet te sien des crijghs volckx vechterijen

En moet maer sijn ghesicht op Angels stucken slaen

Waer op men siet dat niet als legher tochten staen.

Het gen' den mondt verhaelt oft jemants pen can schrijven
Van Ridders vromicheyt, die inde slaghen blijven

Oft ander ongheval t'gen' inden crijgh gheschiet

Dat wordt ons door t'Pinceel van Angelo bediet,

Dat wordt ons door de Const van Angel af ghemalen
Dat siemen sijn Pictuer naer t'leven soo verhalen

Dat geene furi oyt haer cracht soo thoonen can

Oft sijne Const-schildry is daer de weergae van.

Siet eens hoe menich Helt met opgheslaghen armen
Bejevert sijnen moet om t'Vaerlandt te beschermen

Daer schijnt dat elck soldaet een Alexander is

Beswanghert met gheen vrees of herts beswarenis.

T'schijnt datter Etna scheurt door al het solver smooren
Door al t'ghedommel dat het swaer Canon laet hooren

Daer oock elck peert sich draeght als eenen Bucephal

Om dat de wraeck alleen is Meester boven al.

Hoe fraey en vast ghestelt is alles hier te mercken
Door Const van d'eel Pinceel in Angels cloecke wercken

Dat jeder segghen sou t'is t'leven en Natuer

Den strijdt die wort bethoont in Angelos Pictuer.