Het gulden cabinet van de edel vry schilderconst (1662)

Het gulden cabinet van de edel vry schilderconst

(1662)–Cornelis de Bie– rechtenstatus

Auteursrechtvrij

Vorige Volgende



[pagina 308]
David Ryckaert Schilder van Antwerpen, gheboren anno 1615. OP Susters van Parnas; laet eens u stemmen klincken In d'ooren vande Faem en in ons boesems sincken Tot lof van Rijckaerts Const en sijnen rijcken aert, Die hy ons met Pinceel seer gheestich openbaert, Op dat sy wort bekent van die hun lusten setten Op Teecken-const en verf, Pinceelen, en Paletten En achten voor gheluck te sitten op den trap Van d'eel Picturas jonst en diepe wetenschap. Die Rijckaerts handelingh soo aerdich weet te volghen Al oft hy uyt Natuer hun cracht had in gheswolghen: Soo vrempt en onghemeyn staet t'werck van sijn Pinceel Het gen sy ons verthoont op doecken oft panneel. Vol ordonnantien en vast ghestelde trecken Die seldsaemheyt ghenoch in sijn schildry ontdecken, Midts t'rechtsnoer van t'vernuft daer in verborghen is Door haeren cloecken aert en fraey ghesteltenis. T'gen' jeders gheest verweckt en can t'verstant verlichten Als jemant dese Const met smaeck eens gaet besichten Die oock belijden moet, tot alle Haters spijt: Dat daer in schuylt den gheest van overvloedicheyt. Die nimmermeer beswaert t'ghemoet van jemants sinnen Door al den nieuwen aert die daer stets schuylt van binnen Want schoon men vyftich jaer des' Const gheploghen had Soo vintmen daeghelijckx daer in een nieuwen schat. T'is met des' Const ghestelt als met Medeas saecken Ga naar margenoot+ Oft haere toovery, die Grijsaerts jonck cost maecken In haeren pot op t'vier, wast beest oft ouden mensch Sy stackse af de keel en werden jongh naer wensch.
[pagina 309]
DAVID RYCKAERT Prit sa naissance en Anuers lan 1613 il at apris cher son pere dauid Rÿckaert est grand maistre en petites figures, principalement en escuries et semblable edifices certes illustres auÿ ordonnances rustiques, ainsi que son Altesse Impreriale L'Archiduc Leopold, L'e trouue ses pieces dignes de son cabinet comme ausi autres Princes mais il est sur touts autres excellent en peinture de la lumiere de chandelle. Dauid Ryckart pinxit. Frederick Bouttats sculpsit. Ie. Meyssens excudit.
[pagina 310]
Soo gaeghet met Pictuer in haere Const schildrijen Als met Medeas pot en al haer tooverijen, Want schoon een Schilders hant door ouderdom wort stijf Soo brenght hem dese Const een jongher hert in't lijf. Een jongher siel (soo t'schijnt) die wort in hem gheboren Als hem een nieuwe Const met lusten compt te voren, Waer uyt hy nieuwen aert van handelingh can sien Soo alsmen menichmael en dickwils siet gheschien. Soo alsmen in het werck van Rijckaert can bemercken Hoe eel en rijckelijck dat staen sijn trotse wercken, Waer in te vinden is de Keest van alle Const Die weerdich is met eer en hooghen lof bejonst. Siet eens hoe hy Natuer van alderley ghewassen En alle keucken goet op sijn Pinceel doet passen En in hun stil gheheym des levens aert bethoont Sulckx dat den gheest is weert met louwer-groen becroont. Laet roepen eens by een Pictuers ghevoeghde stemmen Om den bevrosen gheest en steeghen wil te temmen Van Momus, die daer in altijt te vinden schijnt Tot Rijckaerts achterdeel jet dat sijn roem verclijnt, Ter wijlen geen Figuer van hem wort afghemalen Oft sy en is begaeft met tweede levens straelen, Met de volmaecktheyt die Natura gheven can Soo als de daet bewijst en gheeft daer reden van. Noch een besonderheyt moet ick in't licht hier brenghen En met sijn ander Const in des' ghedichten menghen, Dat is het vrempt ghewoel van alle snaeckery Die hy seer aerdich weet te thoonen in schildry. Dat is t'wanschapen spoock des afgronts wree ghesichten T'gen' quelden Sint Anthoon, met helse wederlichten Vol furi, vier en vlam, vol vreeselijck ghedruys T'gen somwijl sijne deught ded' vluchten door het Cruys.
[pagina 311]
Voorts ander toovery en vremde aventuren, Weet sijne wetenschap soo constich uyt te vueren, Dat niet van hem en compt, oft t'heeft besonder deught En t'levens crachten in tot leeringh vande jeught. Die niet en is vernoeght om selfs des' Const te pleghen Maer is oock boven al tot d'eel Pinceel gheneghen Van ander Meesters die hy heeft in overvloet, Waer op hy somtijts scherpt sijn lusten en ghemoet. Daer hy de schatten van sijn rijck-begaefde sinnen Tot ciersel van sijn Faem, een hooghen naem doet winnen, Want noyt en brenght hy in het licht een constich belt De gaven van den gheest die sijnder inghestelt.	margenoot+ Ovid. lib. 7.

Vorige Volgende