Het gulden cabinet van de edel vry schilderconst

[p. 328]

Peeter Tysens
Schilder van Antwerpen.

MAeckt Tijsens man noch mensch, waerom doet hy't soo blijcken?

Men seyt: thoont dat ghy sijt oft sijt ghelijck ghy thoont,

Neen, blijcken sonder daet is dat de Schilders croont.

Dat best Natuer ghelijckt, dat moet schildry ontlijcken,

Schijn sonder sijn (beken ick) heetmen leughen, maer

Als het Pinceel soo lieght, dat seyt het meeste waer.

M.B. Wie ghelijck Godt.

Antwoort vanden Autheur, op den selven trant.

Gaet Tijsens inde Son, hy doet sijn schaduw' blijcken,

Een schaduw' die de cracht van't menschen leven thoont

En sijnen naem door Const met lof en eer becroont,

Die t'leven naest bestaet en schijnt Natuer t'ontlijcken

Om dat een ydel schijn is sonder lichaem, maer

De vruchten van Pinceel sijn schijn, en segghen waer.

Als jemants gheest vervalt op't schild'ren van pourtret

Hoort over sijne Const verscheyden oordeel gheven,

Hoe aenghenaem en fraey, hoe suyver, cloeck en net

Dat sy haer wesen draeght en thoont ghelijck het leven,

Soo weetmen noch al jet te segghen op het belt

By die het minst verstaen van haer verholentheden,

Want schoon het op sijn maet en reghel is ghestelt

Noch wort al even wel haer edelheyt bestreden.

Het gen' Pictuer weerstaet van Tijsens door de cracht

Des levens schoont die schuylt in sijne verf-Pinceelen,

Waer van het bloedich vlees (soo t'schijnt) wort voorts gebracht

Soo gheestich weten sy des levens aert te teelen.

[p. 329]

Orbis Roma caput bellorum turbine quondam

Obruta cur fremuit? Martis amica fuit:

Ast ubi multiplicis sese dedit Antis alumnam,

Celsa Triumphatrix se super astra tulit.

[p. 330]

 

Wat dienter meer gheseyt, t' is Tijsens die bethoont

 

Dat niemant eenich eer aen sijn Pinceel can weyg'ren

 

Jn wiens Const niet als besielde verf en woont

 

Die haer weet boven cracht van't leven schier te steyg'ren,

 

Sulckx dat hy daeghelijckx d'onsterflijckheyt naer streeft

 

Om in het levens boeck van Fama eens te comen,

 

Want t'gen' sijn eel Pinceel maer eens ghetoetst en heeft

 

Schijnt t'leven oft natuer te hebben aenghenomen.