Het gulden cabinet van de edel vry schilderconst

Abraham Bosse
Plaedt-snijder en ordonnanti etser.

DE driften vanden gheest oft menschelijcke sinnen

Bethoonen sulcken kracht in elck besonder werck,

Dat wie het wesen siet haer Consten moet beminnen

Als jemandt daer op slaet sijn edel oogh-ghemerck;

Daer Bosse d'eer van heeft, om t'ysers edelheden

Die met de teeckeningh wel comen over een

Soo jemandt plaeten siet van sijne handt ghesneden

Die seldsaem sijn, en veer vervrempt van het ghemeen.