Sommighe Daghelicsche Ghebeden
(1595)–Pieter de Bisschop–
Auteursrechtvrij
[Folio A6r]
| |
Dit is de rechte Christen Cruysvaert Leydende ten eeuwighen leven waert.Wilt ghy wel sien soo steect u ooghen wt te voor Ga naar margenoot1
Wilt ghy wel hooren, soo zijt doof in v ghehoor
Wilt ghy wel spreken, zoo zijt stom meest tijt,
Wilt ghy wel gaen, uwe voeten afsnijt,
Wilt ghy v zelven lief hebben, zoo haet v eyghen leven hier,
Wilt ghy wel leven, zoo doot v aertsche leden fier,
Wilt ghy Rijcke wesen, zoo wort Arm inder daet,
Wilt ghy zeker leven, altijt in vreesen staet,
Wilt ghy verheven zijn, zoo vernedert v hier zeer,
Wilt ghy gheeert zijn, zoo versmaet v zelven meer,
Wilt ghy wel doen, zoo eert die v versmaet,
Wilt ghy tgoede hebben, zoo schict v tot het quaet
Wilt ghy blijde wesen, zoo zijt droeve te recht,
Wilt ghy wijs wesen, zoo zijt dwaes end’ slecht,
Wilt ghy ruste hebben, zoo wilt v tot arbeyt stellen,
Wilt ghy inden Hemel komen, zoo daelt inder hellen,
Wilt ghy wel sterven, so sterft eer ghyt sterven doet,
Zoo zult ghy konnen sterven als ghy sterven moet.
Doch dits de hooftsomme van alle Leere,
Datmen voor alle dinghen vreese Godt den Heere,
Ende houde syne gheboden voort ende voort,
Want zulcx alle menschen toebehoort:
Want Godt zal alle werc stellen voor tgherichte,
Dat verborgen is tzij goet of quaet bringen int lichte.
Maer om eyndelic zalich te worden moetmen ghelooven eest
Ja God den Vader, den Sone, den heylighen Gheest,
Dry persoonen, maer een eenich Godlijc wesen tsamen,
Hier toe verleene ons God syne ghenade, AMEN.
|
|