Gemmarum et lapidum historia

Genera & loci natales. Cap. LXX

PLinio authore multa berillorum sunt genera. Probatissimi viriditatem puri maris imitantur. ⁺Proximi his sunt Chrysoberilli paulo pallidiores, sed in aureum colorem exeunte fulgore. ⁺Vicinum genus huic est pallidius, vocatur chysoprasus. ⁺Quarto loco Hyacinthizontes colore hyacinthi. ⁺Quinto Aeroides viridiores qui ab aere nomen habent. ⁺Post hos cerini, cerae & oleagini oleo, ac tandem cristallis nonnulli similes. Sub istis generibus non dubito quin multae aliae gemmae, quae nunc ad alias referuntur, contineantur. ⁺Nam videtur Berilli nomen commune fuisse ac fere omnes eas gemmas quae crystalli instar diluto aliquo colore tinctae fuerunt sub se comprehendisse. Nam quos nunc citrinos, topasios, lucosaphiros vocant, vt & hyacinthi quaedam generam, non est dubium quin inter berillos numerata fuerint. Itali etiam hodie cristallos qui angulorum multiplici reflexu aliquos colores in se habere videntur, berillos vocitant. Reliquarum nationum gemmarii illos tantum qui marinae aquae colorem vel dilutum vel exactè referunt, Berillos vocare solent. ⁺Nascuntur berilli ad radices Tauri montis in Eufratis littore ac in India, dilutioris coloris & qui cristallis similes sunt, in variis regionibus, vt in Germania & Bohemia.

+ Chrysoberillus.

+ Chrysoprasus.

+ Hyacinthizontes.

+ Aeroides.

+ Cerini.

+ Berillus veterum multas gemmas comprehendebat.

+ Locus vbi nascatur Berillus.