Gemmarum et lapidum historia

Vires, facultates, proprietates & natura lapidis Bufonis. Cap. CLI.

IMprimis praedicatur hic lapis ad tumores atque inflationes à venenatis animalibus illatas, quas crebro contactu discutit. Nam si scarabei, glires, vespae, araneae aut sorices alicui parti insederint aut damnum intulerint, admotus parti affectae lapis, dolor mitescit, tumorque partis subsidet. Praesente poculo venenato fertur hic lapis non solum colorem suum mutare, sed etiam sudare, ac guttas à se emittere. ⁺Proinde ad deprehendenda venena vtilissimus habetur. Propinatur à nonnullis ad venena magna vtilitate. Annulo perforato insertus, vt cutim tangat, praesente veneno cutim calefacere perhibetur. Hodie à multis ad praedicta expetitur, annulisque, licet ingrati coloris sit, gestatur. ⁺Praeterea ad renum dolores antiquos tollendos, & calculi generationem prohibendam, celebratur. Nam ad ea singulare & certum amuletum esse à gemmariis lucri auidis praedicatur. Vilis nihilominus est hic lapis, nec maioris venditur quam à venditore emptoris desiderium aestimetur.

+ Ad venena.

+ Ad calculum.