Het gheestelyck blom-hofken van Bethleem

[p. 4]

Tot den godtvruchtighen sangher.

GOeden Sangher wilt ghy weten,

VVaer toe dat dit Boeckxken dint?

T'is om datmen soud' vergheten

All' vuyl Liekens, diemen vint

Door de heele wereldt vlieghen,

Door het boosen Satans saet;

VVaer door hy ons wilt bedrieghen

Om te brenghen tot het quaet.

Ist niet beter dat wy singhen,

Een Lied' aenghenaem aen Godt,

Dat den Gheest oock doet opspringhen

In sijn Goddelijck Ghebodt?

T'is voorwaer soeter te singhen

Eenen sanck die Godt behaeght,

Als een Lied' vol eyd'le dinghen

Dat de conscientiê knaeght.

Al wie dan de Liekens minnen

Vande wereldtlijcke school;

VVeten niet wat sy beghinnen,

VVant sy woonen in een hool,

Met de duysterheyt bevanghen,

Soo dat sy niet in en sien,

[p. 5]

 

VVaer sy loopen met verlanghen,

 

Tot dat 't eynde sal gheschîen.

 

Ick en wille u niet segghen

 

Datmen hier noeyt singhen moet:

 

Ia ick wil dat weder-legghen:

 

Dickwils singhen is seer goet;

 

Als de Liekens sijn vol deughden,

 

(Ghelijck vooren is gheseyt)

 

Singht dan vry met volle vreughden,

 

Al waert t'allen ur' en tijt.

 

Die sy selven dan wilt temmen,

 

Singht soo wel dat uwen gheest

 

Over-een-komt met u stemmen;

 

Dat behaeght Godt aldermeest.

Cap. 19. Reg. S.P. Bened.