Dagboek van Cornelis en Philip van Campene, behelzende het verhaal der merkwaardigste gebeurtenissen, voorgevallen te Gent sedert het begin der godsdienstberoerten tot den 5en april 1571

Hoymaendt.

Den eersten waren twee mannen bijder stede levende verberrent⁺ upde patibulaire plaetse, buten de Mudepoorte, ter causen van diverssche moordadeghe dieverien, bij hemlieden onghenadelicken bedreven buten ende binnen der stede, naer

+ Justitie.

[p. 230]

tgheluudt vande sententie, thuerlieder laste bij scepenen ghepronuncieert.

⁺ Den XI^en es de bisscop smorghens ghegaen, voor den VIII hueren, naer de kercke van sinte Veerle, om aldaer de aultaren te consacreren naer de oudde lovelicke usancie vande catholijcken, die over III jaeren wierden bijden Calvinisten ghevioleert, daeromme dat menich man van eere in truere commen es, God betert, maer de voornomde consecratie wierdt uutghestelt tot up eenen anderen dach.

Van ghelijcke ceremonien heeft de bisscop ghebruuct in andere kercken ende capellen, alst hem goedt ghedocht heeft.

⁺ Ten zelven daghe waren an sinte Baefs kercke gheaffigiert tweederande briefven, onderteeckent bij den huissier van boven, Lindeman. In den eenen was ghedachvaert te compareren voor den Raedt vanden Hertoghe van Alve, binnen III, X daghen Olivier Serlambrecht, f^s Oliviers, ende Lauwereyns Dhamere, ende inden andere Claude Goetghebuer, capiteyn gheweest hebbende vande beeldebrekers binnen deser stede over drie jaeren, zo hier voren ghescreven staet anden XVI^en ende XXI^en Lauwe LXVII, danof menich man verwondt es gheweest, want hij naer de beeldesturmijnghe langhe vrije ghegaen heeft, ende menich man bedreghen, ende eens ghevanghen zijnde, wierdt ontsleghen ende nu van nieus inneghedaecht, welcke daghinghe tendeert ten fijne van confiscatie als alle andere. Inghelijcs ghebuert ooc in andere steden, namelick tot Antwerpen, daer ooc diverssche fugitiven werden voor stadhuus inneghedaeght, ende die huusen ende goedinghen werden verpacht ten proffijte vanden Conijnck, maer niet bet vercocht dan alleene huuscatheylen ende mueble goedinghen. Ende de ontfanghers pretenderen de jaerlixe pachten te ontfaene vanden jaere LXVI, als de predicatie ghebuerde vande ghereprobeerde religie, ende bijdien en valideert den pachters niet de betalinghe, die zij alsdoen ghedaen hadden huerlieder meesters ter goeder trauwen. Voorts de voornomde ontfanghers pretenderen recht thebbene van confiscatie upde goedinghe verstorfven naer den ban ghe-

+ Wijdinghe.

+ Olivier Serlambrechts, Lauwereyns Dhamere, Claude Goetghebuer.

[p. 231]

pronuncieert ten laste vande fugitiven, de zelve faictelic tot hemlieden treckende uut laste ende bevele vanden Raedt vanden voornomden hertoghe, alzo ooc hier vooren werdt te kennen ghegheven anden XXIII^en van Maerte LXVIII.

Den XVII^en zijn diverssche Spaignaerden, wel ghemonteert⁺ te peerde, ghepasseert duer dese stede, nemende huerlieder wech naer Antwerpen, danof zom ghefouriert waren binnen Loo Christi, heerlichede van mijnen heere de proost van sinte Baefs, ende de insetenen quamen halen de victaelge uut dese stede voor de Spaignaerts. Die van Deynse zijn ontsleghen van huerlieder Spaignaerden, daeromme dat zij blijde zijn gheweest, want die hebben aldaer langhen tijdt gheleghen, ten grooten koste vande inwoonders, ende zijn alhier ghepasseert zoot voorscreven es.

Den XXV^en, wesende den feestelicken dach van sinte Jacop,⁺ hebben de Spaignaerden vanden nieuwen casteele, ter eeren vanden voornomden heleghen, als patroon vande Spaensche natie, afgheschoten, smorghens tijlick ten drije hueren, sommeghe groote engienen, ende de standaerden upgherecht naer huerlieder costume.

Den XXVII, ontrent den V hueren savents, es duer dese⁺ stede ghereden, commende van Brugghe, den capiteyn vanden nieuwen casteele van Antwerpen, een Spaignaert, brudeghom wesende, met sommeghe waghens vergheselschipt, zeer triumphantelic rijdende naer Antwerpen.

Den XXVIII^en was smorghens begonst ghereedscip te makene⁺ upde Vriendachmaert, omme twee wederdoopers bijden viere ter doot te bringhen, volghende de placcaten ons gheduchts heere, maer es tselve uutghestelt tot up eenen anderen dach, uut eeneghe merckelicke redenen.

+ Spaignaerden passeren.

+ Sint Jacop.

+ Spaignaert brudeghom.

+ Justitie.