Dagboek van Cornelis en Philip van Campene, behelzende het verhaal der merkwaardigste gebeurtenissen, voorgevallen te Gent sedert het begin der godsdienstberoerten tot den 5en april 1571

[p. 297]

1571.

Lauwe.

Den IIII^en passeerden duur dese stede sommeghe Walssche⁺ soldaten, die huerlieder wech namen naer de Mude poorte, ende van daer naer Zeelandt, omme aldaer te gaen ligghen in garnisoene, updat tselve landt te bet mach bewaert wesen jeghens de zeeroovers ende de wilde Guesen, die alreede begonst hebben up sConijncs van Spaignen steden van dese Nederlanden ghewelt te doene, ende namelic innemende een casteelken, gheleghen ontrent Worcum ende Gorcum, dwelck corts daer naer wederomme inneghenomen hebben de Spaignaerden, ende een groot deel van hemlieden zijn versleghen gheweest ende sommeghe binnen Antwerpen, residentie vanden Hertoghe van Alve, ghevanghen ghebrocht. Daer zijn ooc int innemen vanden casteele eeneghe Spaignaerden versleghen (zo men zeght). Ende ooc ontrent desen tijdt heeft de Heere van Berghen, bij Cleven, ghebannen, zijn landt wederomme met ghewelt inneghenomen, daer duere de Hertoge van Alve beroert es gheweest met alle zijnen Raedt, ende men beghint sommeghe steden van garnisoenen te voorsienen, als Hulst ende meer andere ontrent der zee ligghende.

Den XII^en, wesende den eersten dinghdach naer kerstmesse,⁺ inden Raedt van Vlaenderen hebben twee procureurs, danof deen was Joos Braye, ende eenen anderen van buten, gheadmitteert gheweest tot exercitie van huerlieder officie, met vermaninghe ghelijc voorscreven es, hemlieden ghedaen bij mijnen heere de president van Vlaenderen.

+ Soldaten passeren.

+ Pardoen.

[p. 298]

⁺ Den XV^en heeft men met een trompet ende anderssins den insetenen deser stede vermaent tot betalinghe van den hondersten penninc over de derde reyse.

Den XVI^en ende andere naervolghende daghen heeft men betaelt ande commijsen den hondersten penninc, in scepenhuus ende elders, daert hemlieden beliefde te ontfaen.

⁺ Den XVIII^en, alzo eenen joncman meende over thijs met snee bedect te gane, ontrent de calchovens, es verdroncken, ende de snee heeft desen dach ende andere voorgaende in sommeghe plaetsen bet dan een mans linghde hooghe gheleghen, want het heeft bet dan XX daghen ghesneeut zeer abondantelic, zonder dat de snee binnen middelen tijde ghesmolten es, maer es bliven ligghende, daerbij dat sommeghe meynsschen zijn verdroncken gheweest ende eeneghe vande wulven gheten.

⁺ Den XXIX^en ende andere voorgaende daghen heeft een groote ende excessive coude gheweest van snee ende vriesen, dat de schamele insetenen deser stede gheloopen hebben buten der stede met menichte ende gheweert ende thuus ghedreghen diverssche troncke eecken, zo dat de clachte commen es an scepenen ende andere heeren, die met tgheluut van eenen trompette upde ghecostumeerde plaetsen hebben tselve onbehoorlicken afcappen ghedaen verbieden, up peyne van gheesselinghe, ende men heeft ooc gheboden, dat men de lommelen vande rivieren open houden zouden ande waterganghen, updat men te bet mach wederstaen in ghevalle van brande; ende onder de aerme lieden es nu gheweest een groote benauthede van coude, ende omme de dierte vanden berrinchaute⁽¹⁾.

+ Hondersten pennijnck.

+ Verdrijncken.

+ Coude.

(1) Berrinchaute, brandhout.