Maechden-plicht ofte ampt der ionkvrouwen, in eerbaer liefde, aen-ghewesen door sinne-beelden

[fol. **2r]

Aen-spraecke tot alle belast met Maeghden-sorghe

OVders, Vooghden, Vrienden, Broeders,

Maeghden-hoeders,

Eer-bewaerders van den Douck,

[Al]s ghy Dochters wilt besteden,

Souckt u reden

Nerghens, als in desen Bouck.

[We]duw'-vrouwen, eerbaer herten,

Vol van smerten,

Die nu zijn moet vrou en man,

[He]bt ghy Dochters jonck van jaren,

Teere Waren,

[Hi]er is, dat u helpen can.

[Ma]eghden die nu crijght behaghen,

Om te jaghen

In des liefdes jeughdich velt,

[Om] niet buyten's weegs te dwalen,

Hout de palen

U in desen Bouck ghestelt.

[Ion]gh-mans die den crijgh der minnen

Wilt beginnen,

Eer ghy treed' in dit ghevecht,

[Le]ert, hoe ghy dees teere Dieren

Dient te vieren,

Dit is 't Boeck van 't Maegde-recht.

Naso heeft wel in sijn leven,

Veel gheschreven,

Hoemen mint, en wert gevrijt;

Maer veel dinghen, die wy lesen,

Zijn mis-presen,

Als onnut in onsen tijt.

Naso door sijn geyle streken,

Leert ghebreken

Daer een eerbaer hart om sucht:

Maer dit Bouxken soet in leere,

Vol van eere,

Geeft ons wijsheyt met ghenucht.

Dat de Maeghden wel bestieren

Haer manieren,

Is voor d'Ouders wonder soet:

Datse door een eerlick trouwen

Werden Vrouwen,

Is voor heel de weerelt goet,

Beyde dees soo groote saken

Can hy smaken,

Die dit Bouxken vraegt om raet.

Het zy dan by alle menschen.

Die daer wenschen

Dattet wel op 't Aertrijck gaet.

J.A.F.