Noch een ander corte Forme des moghens Ghebets.
O Heere Godt lieve Hemelsche Vader, ghy die onse schepper ende versorger zijt, onder welckes ghenadighe bescherminge wy dese nacht ruste oock genadelijck gehadt hebben, waer door wy u billijck loven ende dancken. Maer, o lieve Vader, soo veel wy in desen uwen weldaet eenighsins misbruyckt hebben, teghens uwen Goddelijcken wille, d'welck wy geerne met berou belyden, dat wilt ons doch om uws Sons Christi wille vergeven. Ende leert ons bedencken, waerom ghy desen dach hebt weder om te voorschijn laten comen, op dat wy desen ende volghens alle die daghen onses levens, sober, rechtveerdich ende Godsalich mogen doorbrengen, alsoo dat uwen heyligen naem geeert ende gepresen, ende wy uyt ghenaeden eeuwich behouden ende salich mogen worden, hiertoe laet uwen goeden heyligen Gheest ons geleyden, ende uwen goeden Engel onsen wegh voorspoedich maken: O Godt dat bidden wy u in den naem uwes gheliefden Soons Iesu Christi, die ons heeft leeren bidden: Onse Vader.
O Heere wy dancken u met aendacht,
Ghy die ons behoede in dese nacht,
Bewaert ons huyden, wilt al ons saken,
Na u behaghen voorspoedich maken, Amen.
Auteursrechtvrij