Een ander corte Forme des Avont Ghebedts.
O Barmhertighe lieve Hemelsche Vader, dewyle ghy ons desen dach het clare licht der Sonnen hebt laten ghenieten, om voor u oprecht nae uwen heyligen wille te wandelen. Daer voor dancken wy uwen heylighen Name, ende bidden u dat ghy ons doch wilt vergeven 'tghene wy hier in grootlijcks versuymt, ende daer tegens ghehandelt hebben, het welck wy gheerne belyden, wilt ons doch ghenade verleenen, dat wy ons nederlegghende totter rusten onder die schaduwe der vleugelen uwer Godlijcker ghenaden moghen behoedt ende bewaert blyven, teghen allen listighen aenloop des vyants, die dach ende nacht om ons gaet, dat wy alsoo dese nachtsruste danckbaerlijck moghen ghebruycken, ons alle tijdt voorsiende op die comste uwes gheliefden Soons, door welcken wy dit Ghebedt voor u uytstorten, ende segghen: Onse Vader, etc.
O Heere als wy rusten, so wilt ghy doch waken
Over ons ten besten in alle saken,
Wy bevelen in uwen handen met namen,
Onse ziele, den Gheest, en 'tlichaem, Amen.
Auteursrechtvrij