Historien van Troyen

¶ Dit is dat drientwintichste boec ende die elfste strijt In welcken wert verslagen coninc trestenus van dyephebus Ende dyephebus die wert weder verslagen van palamides der griecken ouerste Ende coninc palamides die wart weder verslaghen van paris

ENde wanneer als die tijt des bestants was ouer gegheleden. soe sijn beide die parthien weder te strijde ghecomen ende si hebben doe seer wredeliken onderlinghe gestreden ende gheuochten Ende dyephebus die bestreet coninc trestenus van agresta. ende coninc trestenus die bestreet hem weder met sijnre glauyen. ende hi wondede hem te malen seer Mer wanneer als dyephebus vernam dat hij ghewont was. soe sloogh hij alsoe wredeliken ende nijdelijcken coninc trestenus. dat hij doot viel neder opter aerden van sinen paerde Ende van sinen doot wert een seer groot iammerlijck gherufte onder den griecken Ende die troeyanen die bestreden die griecken also vromelijcken dat die griecken moesten wijken Mer palamides ende dyomedes die quamen doe den grieken te hulpe met twin-

[fol. 92r]

tich dusent ghewapender mannen Ende si quamen den troyanen doe te ghemoete Ende oec mede quam doe met hem die edele ende vrome ayax. thelamonius. die welcke dat seer haestelijcken bestreet. stelenus coninck priamus bastaert soen. ende hi sloech hem also swaerlijcken. ende hi quetsede hem in sinen arm. alsoe dat stelenus niet meer vechten noch striden en mochte welcke als dyephebus versach so wert hi seer toernich. ende hi bestreet mit enen wreeden verwoeden sinne. ayax thelamonius. ende hi werpen seer ghewont van sinen paerde. mer wanneer als coninck palamydes dat versach. soe woude hi dat rechteuoert wreken. ende hi nam een scarpe glauie. ende hi reet op dyephebus. ende hi brack hem sinen helme ende sine borstplaet. ende hi stack hem mit sijnre glauien in sijnre borsten. alsoe harde dat die glauie brack. ende dat yser brack dyephebus in sijnre borsten: Ende paris dyephebus broeder. wanneer als hi sach dat dyephebus sijn broeder alsoe ter doot was ghewont. soe brochte hi hem mit vele tranen ende mit groten ghewelde bider mueren vander stat van troeyen. Ende so dede dyephebus sijn oghen op. ende hi sach seer ontfermeliken op paris sinen broeder. ende hi sprac tot hem aldus O mijn alre liefste broeder sulstu nv mi aldus laten steruen. ende neder dalen laten ter hellen onghewroken Ic bidde ende vermane di. eer dat dit yser van deser glauyen werde ghetoghen wt mijnre borsten. dattu eerst den ghenen. die mi aldus swaerlijcken ghewont ende ghequetst heeft. alsoe vromelijcken ende wreedelijcken bestrides. alsoe dat hi ymmer sterue voer mi van dinen handen. Doe paris dese woerden hadde gehoert. soe liet hi sinen broeder die ymmer steruen moeste in corter stont ende hi reet mit groter droefheyt weder te stride. ende hi sochte met groten swaeren arbeyde alsoe langhe. dat hi doe coninc palamydes vant vromelijken stridende teghen coninck serpedon. want coninck serpedon die waende palamydes den coninck te verslaen. mer palamides die bestreet weder coninck serpedon alsoe vromelijcken. met enen bloten swaerde. dat hi hem sloech in sijn dye. dat hi neder viel beswijmt opter aerden van sinen paerde Ende doe bleef coninck serpedon daer haestelijcken doot Ende doe paris versach dat coninc palamydes die troeyanen alsoe iammerlijcken versloech. soe spannede hi sinen boghe rechteuoert. Ende hi schoet met enen venijnden scut-

[fol. 92v]

te palamides doer sijn kele. dat hij daer neder doot viel van sinen paerde opter aerden Ende wanneer die griecken vernamen. dat coninc palamides was verslaghen. soe werden die griecken seer veruaert. ende si werden alle te samen voervluchtich voer haren tenten. die welcke dat die troeyanen seer wredeliken veruolgheden altemalen tot haren tenten toe Mer wanneer als si voer haren tenten quamen. soe keerden si hem omme. ende si streden seer vroemelijcken Ende die troeyanen die stonden haestelijcken van haren paerden. ende si bestreden die griecken seer gheweldelijcken. ende si quamen met crachte inden tenten der griecken. ende si beroofdense. ende si namen daer wt veel gouts ende siluers. ende ontallike groote rijcheden Ende doe quamen aldaer te samen paris ende troeylus sijn broeder met dertich duysent vroemer mannen die wel ghewapent waren Ende die gheboden datmen vuyer maken soude inden scepinghen der grieken om die te verbarnen in corter tijt Ende doe wert die luchte al omme alsoe swart vanden roke. als oft bi nae nacht gheweest hadde Ende daer na so sceen die lucht te barnen. alsoe dat die brant doe wert bescouwet ende ghegesien opten muyeren vander stat van troeyen Mer doe quam aldaer thelamonyus ayax met groter moghentheyt seer vroemelijken te stride. ende hi street teghen den troeyanen. alsoe dat doe daer gheschyede een groot swaer dootslach aen beyden sijden Ende die troeyanen die souden doe sonder twyuel alle die vergaderinghe der griecxscher scepen verbrant hebben. en hadde ghedaen thelamonyus ayax. die welcke dat op die tijt met sinen handen volbrachte alleen grote wonderlijcke dinghen Ende op die selue tijt. soe werden aldaer verbrant vanden troeyanen. meer dan vijf hondert scepe Ende op die tijt. soe hadden die troeyanen alsoe grote victorye ende seghe. datter doe der grieke ontallike veel ter doot werden ghewont. behaluen die ghene die doe daer verslaghen werden. Onder welcken datter doe sonderlinghe een seer was ghewont ter doot toe. ende hij was ghenoemt heber des conincs soon van trachia Welcke heber ghesteken ende g heslaghen was met eenre scarper glauyen in sijnre borsten. alsoe datter een stuc vander glauyen metten yser bleef steken in sijnre borsten: Ende dese selue heber die wart doe ghebracht in achilles tente. die omme die minne ende liefte van

[fol. 93r]

pollexina des conincs dochter van troeyen. ghenoemt priamus. doe niet wt gaen en woude te stride ende wanneer als heber aldus daer ghewont lach soe versprac hi achilles met seer herden fellen woerden om dat hi sine lants luyden niet en quame te baten noch te hulpe. die welcke dat hi alsoe iammerlijcken sach steruen ende te nyete gaen inden stride die hi also wel bescermen ende behoeden mochte Ende wanneer als dit stuck van deser glauien wt sijnre borsten wert ghetogen so gaf heber rechteuoert sinen geest. ende hi starf aldaer dattet achilles aensach. Ende langhe tijt daer na so quam daer een van achilles knechten vten stride Ende doe achilles hem vraghede hoe dattet mitten gryecken inden stride waer vergaen. soe antwoerde hem die selue knecht aldus Och och hoe qualijcken soe isset huyden den gryecken vergaen om die grote menichuoudicheyt willen der troeyanen. want het is seer wel te ghelouen ende te vermoeden. dat alle die troyanen die wapenen voeren mochten. dat si huyden ten stride ghecomen sijn ende datter nyemant binnen der stat van troeyen ghebleuen en is Ende al hier om lieue here Ic segghe v dat inder waerheyt dat die troeyanen te hant alle te samen seer vermoeyt sijn inden stride van groten arbeyde die si ghedaen hebben Daer om. waert dat sake dattet v gheliefde ende dattet v dachte wesen oerbaer. ende ghi nv quaemt inden stride want ghi soudet nv grote eeren verweruen. ende lof tot ewighen tiden want die troyanen alle te samen seer vermoeyt sijn inden stride. mer achilles die en achte des knechts woerden niet ende hi en woude heber die daer doot ghebleuen was niet aensien met enigher ontfermherticheyt Mer wat si sach of hoerde. hi veynsede gem seluen altoes. als of hi dat niet ghesien noch ghehoert en hadde. recht als die ghene die mitten bande der lieften ende der minnen was ghebonden. want die minres die hebben dat ouer hem van gewoenten ende manieren. dat si der eeren en wachten noch en achten. wanneer als si hare ghelieuen duchten te vertoernen Ende si laten om sulke saken willen dicke ende menichweruen achter goede eerlijcke saken ende wercken Ende aldus gheliker wijs als daer voer gheseit is. soe was aldaer een seer nydich strijt. twisschen den gryecken ende den troeyanen. mer als dien dach ten auont ghecomen is soe quam die strijt ten eynde Ende paris ende troeylus die reden te samen vten strijde. met haren troeyanen. Ende si

[fol. 93v]

quamen in die stat van troeyen. daer dyephebus haer broeder noch leefde in groter crancheit Ende wanneer als paris ende troeylus te samen quamen bi dyephebus haren broeder. soe werden si beyde seer bitterlijcken met hem wenende ende screyende. als die ghene die voer hem begheerden te steruen. waer dat dyephebus haer broeder doe sijn ogen op slooch ende hi sach seer ontfarmeliken op beide sijn broeders. ende hi vraghede hem beyden met eenre weker stilre stemmen. recht als die ghene die steruen moet. of die ghene doot waer die hem alsoe gewont hadde Ende doe paris sijn broeder tot hem seide dat hi doot was so seyde hi datmen dat yser trecken soude wt sijnre borsten. welke yser alset wt getogen was. soe bleef hy rechtevoert haestelijcken doot Ende alle die troeyanen die waren vtermaten seer bedroeft van dyephebus doot. want dat wenen ende screyen ende dien groten rouwe van coninc priamus ende van hettuba der conincinnen. ende van haren kinderen ende van alden troeyanen ouer dyephebus ende ouer coninc serpedon. die en was niet te bescriuen noch te begripen Ende coninc priamus die dede begrauen dyephebus. ende coninc serpedons lichaem een yeghelijck bi sonder in een seer costelijck graf Ende onder den griecken was groten druck ende rouwe van coninc palamides doot. die welcke dat oic mede vanden grieken met grooter eeren ende waerdicheit seer betameliken wert begrauen Ende want die griecken sonder genen ouersten noch capiteyne en mochten wesen. daer om so coren si weder alle te samen eendrachteliken coninc agamenon tot haren ouersten leitsman