Inhoudt der vryicheyt des druckers.
Wy opper Broederen der Duytscher Academie hebben toeghelaten ende ghegheven aen onzen eyghen Drucker Nicolaes Biestkens, te drucken 't Geselschap der Goden, op de Bruyloft van Apollo ende de Nederduytsche Academie, &c. Ende alzo daer toe niet ghespaert zijn noodige groote onkosten, hebben wy (om te weeren 't onrechtvaerdich bestaen van eenighe gierighe ende baet-zoeckighe menschen, tot groot achterdeel der voornoemder Drucker) een yder willen verwittigen dat wy geene voor d'onze en kennen, als de welcke by de voorsz. Nicolaes Biestkens ghedruckt, uytghegheven ende met dit ons gemeene kleyne zegel getekent zijn. Aldus ghesloten ter vergaderinge der voorghenoemder opper Broederen, inde zale der Duytscher Academie, opden lesten dach der Hoymaent, daegs voor onze Jaerlijckse groote vyerdach. 1618.
Auteursrechtvrij