Het oudt Huysken van Bethleem (1590)

Het oudt Huysken van Bethleem

(1590)–Hendrik de Coster– rechtenstatus

Auteursrechtvrij

met vele schoone leyssenen, lofsanghen ende andere geestelyke liedekens verciert, ter eere van den nieuwen gheboren Coninck onsen Salichmaker Christus Jesus

Vorige Volgende


[Waer is die dochter van Syon]
Dit gaet op Puer nobis nascitur. Waer is die dochter van Syon Ic soudese blijde maken Ic soude haer eene bootschap doen Van alsoo grooten saken. Doen men al die werelt beschreef Doen ginck die maghet sware Te Bethleem daer sy doen bleef Ende ontfinck haer kint aldare Een ghelas al schijnter door Ten breckt niet vander sonnen Dus heeft die maghet nae en voor Ioncfrou een kint ghewonnen. Een duysternis is ons verclaert Een licht is ons verresen Een maghet heeft een kint ghebaert Dat dunct my wonder wesen. Nv is hy teeder ende cranck Een maghet sal hem voeden Wy moghen hem wel weten danck Van sijn groote aermoeden. Hy thoont zijn goedertierenheyt Wijlen was hy verbolghen Hy drijft soo groote ootmoedicheyt Wy connen hem niet gheuolghen. Maria nam hem op haren schoot Sy custen hem aen den monde Die minne die hadde sy soo groot
[pagina 9]
Tot hem in allen stonden. Lof Heere moet v altoos zijn Wilt ons altijt gheleyden Met die waerde moeder dijn Als wy alle van hier scheyden. Amen. Het was een maghet wtuercoren Dawer Iesus af sijn wilde gheboren Des ben ick vro. O, o, o, o, benedicamus domino. Al totter stadt van Nazareth Daer is een maghet ombesmet Des ben ick vro. O, o, o, o, bene. Groetse my metten naeme mijn Segt haer dat ick haer kint wil zijn Des ben ick vro. O, o, o, o, bene. Die Enghel was een bode goet Hy oer derwaerts metter spoet Des ben ick vro. O, o, o, o, bene. Hy seyde Godt gruet v suyuer maecht Ghy zijt die Gode wel behaecht Des ben ick vro. O, o, o, o, bene. Hy wil van v gheboren zijn Iesus die lieue meester mijn Des ben ick vro. O, o, o, o, bene. Maria sprac hoe mocht ic hem ghewinnen Want ick noyt man en begeerden om minnen Des ben ick vro. O, o, o, o, bene. Die heylighe gheest sal in v comen Soo den dau valt op die blommen Des ben ick vro. O, o, o, o, bene. Hy seyde Maria weest onuersaecht Tis den Godts sone die ghy draecht Des ben ick vro. O, o, o, o, bene. Hy heeft v daer toe wtuercoren
[pagina 10]
Hy wilt verlossen dat was verloren Des ben ick vro. O, o, o, o, bene. Van allen sorghen ben ick ontsleghen Die deerne Godts wil ick wesen Des ben ick vro. O, o, o, o, bene. Maria viel neder op haer knien Den wille Godts moet gheschien Des ben ick vro. O, o, o, o, bene. Had ick vloghelen als een arent grijs Ick soude soo hooge vlieghe Daer bouen in dat Paradijs Tot mijnen soeten lieue. Dan soude ick segghen vader mijn Wanneer suldy my halen Wt deser allenden ende pijn In uwer hochster salen. Waer is die dochter van Syon Ick wildese vrolijck maken Ick wil haer een bootschap doen Van alsoo hooghen saken. Die hoochste inder minnen Dat is Iesus Marten soone Godt laten wy ons ghewinnen Hier bouen inden throone. Dat hemelrijc ende aerterijck Ons heeft gesloten buyten Dat sal een Maghet reynelijck Door haer baren ontsluijten Die duysternis is ons verclaert Dat licht is ons gheresen Een maghet heeft een kint ghebaert Dat mach wel wonder wesen. Dat kint was teerder ende cranck Een maeghet moestet voeden
[pagina 11]
Tis recht dat wy hem weten danck Van zijnder grooter ootmoeden. Heer Iesus wat hebdy gemeent Wy soudent gheerne vragen Dat ghy hier dus ligt en weent Ghy sijt soo ionck van daghen. Dat ons soo langhe was onghereet Dat mogen wy gebruycken Dat Adam inden appel beet Dat dede den hemel luycken O moeder Gods van hemelrijck, Des Conincx inden throone Bidt alleen voor ons innichlijck Iesum. V lief kindt schoone Dat we daer bouen moeten Daer die Enghelen vrolijck singhen V ende uwen kinde groeten Dat wil ons godt ghehinghen. Amen. Het viel een hemels dauwe Al in een cleyn maechdekijn Ten was noyt beter vrauwe Dat dede een cleyn kindekijn Dat van haer was gheboren Ende sy bleef maghet fijn O maghet wtuercoren Lof moet v altoos zijn. Die Maghet ginck met kinde Geen swaerheyt en ginck haer an Als Ioseph dat versinde Die goede rechtueerdighe man Hy dachte ick wilse laten Ick en ben die vader niet Ende trecken mijnder straten Eer mij meer schanden gheschiet.
[pagina 12]
Al van des hemels throone Sprack hem die Enghel an Ioseph Dauids sone O waerdighe salighe man Blijft alle beyde te gader t’is bouen der natueren cracht Dat Godt almachtich vader In haer dus heeft geuracht. Corts daer na is ghecomen Een Keyserlijck ghebot Dat niemant wtghenomen Hy en quame sonder spot Van daer hy waer gebooren Ende brenghen zijn tribuyt Dat dedemen daer hooren Ende roepen ouerluyt. Maria ende Ioseph mede Quamen te Betheleem waert Want daer was Iosephs stede Als ons die schriftuer verclaert Maer sy en mochten nieuwers inne Men wijsdese altoos voort Die hemelsche Coninghinne En was daer niet ghehoort. Int vet hebben sy vonden Een huys seer dunne ghedaect Binnen soo corten stonden Hebben sy logijs ghemaect Daer wert die maghet moeder Al sonder wee oft pijn Van tsmenschen soon en broeder Hoe mocht hy ons naerder syn. Wt moederlijcker minnen Leyde sy hem op haren schoot
[pagina 13]
Haer herte verblijde van binnen Dat dede sijn mondeken root Sy custen hem aen sijn wanghen Sy custen hem menichfout Dat hy quam sijn gheuanghen Verlossen ionck ende oudt Maria die suyuer fonteyne Daer Godt sijn ruste in nam Bidt voor ons alle ghemeyne Iesus dat Godtlijck lam Dat hy ons inne wil laten. Met hem int soetste dal Daer vreucht is bouen maten Die eewelijck dueren sal.

Vorige Volgende

Over dit hoofdstuk/artikel

lied