Skiplinks

  • Tekst
  • Verantwoording en downloads
  • Doorverwijzing en noten
Logo DBNL Ga naar de homepage
Logo DBNL

Hoofdmenu

  • Literatuur & taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw
Dingeman krijt wjukken (1999)

Informatie terzijde

Titelpagina van Dingeman krijt wjukken
Afbeelding van Dingeman krijt wjukkenToon afbeelding van titelpagina van Dingeman krijt wjukken

  • Verantwoording
  • Inhoudsopgave

Downloads

XML (0.24 MB)

tekstbestand






Genre

jeugdliteratuur

Subgenre

roman


In samenwerking met:

(opent in nieuw venster)

© zie Auteursrecht en gebruiksvoorwaarden.

Dingeman krijt wjukken

(1999)–Eppie Dam–rechtenstatus Auteursrechtelijk beschermd

Vorige Volgende
[pagina 45]
[p. 45]

Haadstik 11
Ik wurd oan 'e kont ta wiet

Doe't ik de oare deis wekker waard, tikke de rein tsjin it glês fan it sliepkeamersrút.

Ik gie op 'e rêch lizzen. Mei de hannen achter de holle seach ik nei de souder. Dit wie myn twadde dei noch mar by Joazef. Toch hie ik hjir al mear meimakke as de lêste fiif jier thús.

Even wienen myn gedachten by ús mem, mar ik hoegde oer har net yn te sitten. Se siet al lang yn Frankryk, mei har freon. It soe dêr wol moai waar wêze.

Ik lústere nei de rein en tocht werom oan it ferhaal fan Kai. Ik seach him sitten op syn hege berch. Hoe kaam er dêr wer wei? Mei in helikopter? Yn in bakje ûnderoan in ballon? Miskien kaam in grutte fûgel by him del en mocht er mei op 'e rêch. Of hy soe fan tintseil wjukken meitsje en sels nei ûnderen ta fleane.

Al prakkesearjend foel ik yn 'e sliep. Ynienen seach ik in monster slang mei in liif as de glierbaan fan in swimbad. De slang lei oan de foet fan de alderheechste berch. Hy kronkele omheech en waard langer en langer en langer. Pas doe seach ik dat er út in gigantise stofsûger krûpte, like grut as de koepeltsjerke by ús yn 'e stêd. Joazef stie derneist as in hiel lyts mantsje. De slang wie in útfining fan him. Hy stjoerde him mei touwen en triedden nei de top. Dêr stapte Kai yn 'e bek fan de slang. In hiel skoft letter hearde ik him yn 'e stofsûger ploffen. Doe wie ik wekker.

Ik klaaide my oan en gie nei ûnderen.

Joazef siet by de keukentafel mei in soart fan tekenboek.

[pagina 46]
[p. 46]

‘Moarn, Dingeman. Goed sliept?’

Ik knikte en seach by him oer 't skouder. Hy hie in skets makke fan de Wjukkestoel. Rjochts ûnder yn it hoekje stie:

 

Sammelboek X

Side 15

Tekening 447

 

Hy skode it boek oan 'e kant en snijde my in hompe bôle ôf. Hy die der bûter op en tsiis, sels makke fan de molke fan Roosje.

‘En? Noch moaie dreamen hân fannacht?’

‘Nee, fan 'e moarn.’

Ik fertelde myn dream oer Kai.

Joazef fermakke him. Hy sei: ‘Dat hat in moaie reis west yn dat slangeliif, wolst dat wol leauwe?’

‘Ja, it wie in moaie útfining fan dy. Ik soe ek wol útfiner wurde wolle.’

‘En juster woest noch keunstner wurde.’

‘Mar ik doch it beide tagelyk.’

‘En dan letter ek noch berchbeklimmer?’

‘Nee, dat kin net, ik ha lest fan hichtefrees.’

‘Hichtefrees bestiet net,’ sei Joazef. ‘Minsken binne noait bang om te klimmen, se binne altyd bang om te fallen. Der bestiet allinnich djiptefrees.’

‘Dêrom bliuw ik noch wol bang. Ik doar mei gimmestyk noch gjin fjouwer treden yn it wandrek.’

Joazef sloech it boek ticht. Op 'e foarkant stie mei grutte filtstiftletters: sammelboek x.

‘Djiptefrees,’ sei er, ‘dêr ha ik wol wat foar.’

‘Piltsjes?’

[pagina 47]
[p. 47]

‘Hâld op. Dy helpe noch net iens tsjin mislik wurde yn 'e bus.’

Hy fertelde dat er noch in bouwurk yn 'e skuorre hie te stean. Nee, ik mocht noch neat sjen. Ik moast him der hjoed mar even mei gewurde litte. It wie no noch in krakkemikkich en gefaarlik ding.

‘Kinst dy salang fermeitsje, Dingeman?’

‘Jou mar in pear boeken,’ sei ik. ‘Ik hâld fan boeken oer natuer. En ik mei ek graach tekenje en skriuwe. Toe mar, ik bin echt wol wend om allinnich yn 'e hûs te sitten.’

Ik hie my foarnommen om net in soad te sizzen oer ús mem, mar foardat ik der erch yn hie, fertelde ik dat ik mei reinich waar noait bûten komme mocht.

‘Wat? Hasto noch noait in bui wetter op dyn kop hân? Dat wurdt dan tiid.’

Hy krige my by de nekke en triuwde my nei bûten.

Even letter stienen we tegearre op it hiem. Joazef hie de earms breedút, hy raasde nei de wolken.

Ik die krekt itselde. Ik smiet de holle achteroer, die de mûle wagewiid iepen, en mei de tonge libbere ik de rein nei binnen. Mei de fingers wreau ik it wetter yn myn hier, it begûn der lekker smoarch fan te rûken. Myn T-shirt wie dweil, ik liet de hannen petse op myn liif. Myn broek wie sompe, it rûn my by alles del. Op 'e sokken nei hie ik gjin droege tried mear oan my. Ik begûn te stampen en te dûnsjen troch de plassen op it hiem. Doe wie ik hielendal klets en de klets.

Ynienen stie ik nei mysels te sjen.

‘Witst watst no bist?’ frege Joazef.

‘Wiet,’ sei ik.

‘Nee,’ sei Joazef, ‘oan 'e kont ta wiet. Hoe wiet?’

‘Oan 'e kont ta wiet.’

‘Dat tocht ik ek.’

[pagina 48]
[p. 48]

Joazef krige my beet. Tegearre dûnsen we oer it hiem. Ik miende dat ik triennen yn 'e eagen krige, mar it wienen wetterdrippen.

Yn 'e bykeuken klaaiden Joazef en ik ús út. We droegen ús ôf mei handoeken mei hurde ribbels. Ik krige der lytse prikkelskokjes fan.

Doe't ik mei oare klean oan by de keukentafel siet, fielde ik my in flinder dy't krekt út syn kokon krûpt wie. Myn hier rûkte noch, en der sieten weake dûkjes yn myn fingertoppen.


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Gebruiksvoorwaarden/Terms of Use
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken