Skiplinks

  • Tekst
  • Verantwoording en downloads
  • Doorverwijzing en noten
Logo DBNL Ga naar de homepage
Logo DBNL

Hoofdmenu

  • Literatuur & taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw
Dingeman krijt wjukken (1999)

Informatie terzijde

Titelpagina van Dingeman krijt wjukken
Afbeelding van Dingeman krijt wjukkenToon afbeelding van titelpagina van Dingeman krijt wjukken

  • Verantwoording
  • Inhoudsopgave

Downloads

XML (0.24 MB)

tekstbestand






Genre

jeugdliteratuur

Subgenre

roman


In samenwerking met:

(opent in nieuw venster)

© zie Auteursrecht en gebruiksvoorwaarden.

Dingeman krijt wjukken

(1999)–Eppie Dam–rechtenstatus Auteursrechtelijk beschermd

Vorige Volgende
[pagina 75]
[p. 75]

Haadstik 17
In spierwite woartel en in panty fol sipels

Doe't we Roosje nei it lân brocht hienen, gienen we yn 'e hûs om drinken. Joazef geat my in glês beisop yn. Hy sette kofje foar himsels.

‘Kinst my aansent wol helpe yn 'e grientetún,’ sei er.

‘Hoelang duorret it eins?’ frege ik.

‘Salang ast sels wolst. Bist myn feintsje net.’

‘Ik bedoel: foardat it kealtsje komt.’

‘O,’ sei Joazef, ‘fjirtich wiken. Krekt as by in mins.’

‘Mei ik dan komme om te sjen?’

‘Wa wit.’

Doe wienen we beide stil.

 

Op 'e tún krige ik in bakje mei sied.

‘Dit wurdt rammenas,’ sei Joazef. ‘Ik meitsje geultsjes yn 'e grûn, do leist de siedden deryn. Hieltyd fyftjin sintimeter útelkoar.’

‘Is dat lekker iten?’ frege ik.

‘It binne krekt radizen, mar dan skerper. Wurdst der ôfgryslik sterk fan yn 'e mûle.’

‘Watfoar kleur krije se?’

‘Fan bûten swart, fan binnen wyt. Ik holje wolris ien út as ik ferkâlden bin. Dan lit ik der in dei lang brune sûker yn stean. Dat leppelje ik dan op.’

Nei it siedzjen moasten we ierappeldolle.

Joazef wrotte de planten los mei in gripe, dêrnei luts ik se út 'e grûn. Meastal bleaunen de lytse knoltsjes oan de woartels sitten.

[pagina 76]
[p. 76]

Dy helle Joazef derôf. Ik lei op 'e knibbels om de grutte knapen út 'e modder te graven. Ik gie der oan de earmtakken ta yn. Poerswart wie ik.

Alle ierappels kamen yn in koer. Ik helle der in grutten en in lytsen út, lei se tsjinelkoar oan en rôp: ‘Sjoch Joazef, dit binne do en ik!’

‘Tink der mar om dat ik dy net opfret.’

Ik die de blêden yn 'e kroade en brocht se nei de ôffalbult. Undertusken spitte Joazef de ierappel-ikker om. Hy woe der aansent prei yn ha.

Preisette wie prachtich wurk. Joazef makke mei in âlde stof-sûgerbuis gatten yn 'e grûn. Ik kaam achter him oan en liet yn elk gat in plantsje sakje. Yn it begjin struide ik de gatten ticht mei fine modder, mar dat hearde net sa.

‘In jonge preiplant moat lucht ha,’ sei Joazef, ‘oars wol er net groeie.’

It wie al iterstiid, mar Joazef woe earst noch woartels út 'e grûn helje. Se stienen yn rigen, hieltyd om en om mei rigen sipels.

‘Guon planten dogge it better byelkoar,’ fertelde Joazef. ‘Sipels ha in hiele sterke lucht, en dêrom komme der dan gjin michjes by de woartels.’

By it woartellûken dienen we in wûnderlike ûntdekking. Der siet ien spierwiten tusken.

‘Fuortsmite?’ frege ik.

‘Wêrom? Omdat er net oranje is?’

Joazef krige de woartel en fage him skjin.

‘Soest him opite kinne?’ frege ik.

‘Miskien wol, mar dan bist him kwyt.’

‘Mei ik him ha?’

Joazef joech my de woartel en sei: ‘Hy sil net altyd sa bliuwe, mar it is ek moai om te sjen hoe't dingen feroarje.’

[pagina 77]
[p. 77]


illustratie

[pagina 78]
[p. 78]

Doe't we klear wienen mei de woartels, sei Joazef dat we ite soenen op 'e tún. Hy soe bôle klearmeitsje, en ûndertusken hie er noch in moai wurkje foar my.

Under in ôfdak stienen fjouwer bakken mei sipels. De blêden sieten der noch oan, al wienen se allegear slop en giel. Joazef woe de sipels yn 'e skuorre ha te hingjen. Dan koenen se fierder droegje en koe er se langer bewarje.

‘Moatst it blêd derôf draaie,’ sei er. ‘Toe mar, draai him de nekke mar om. Krekt, op dy manier.’

‘En wêr moat er no yn?’

Joazef lake geheimsinnich.

‘Lit ik no tafallich wat by my ha.’

Hy wrotte de hân yn 'e broeksbûse. Der kaam in net út mei de kleur fan leverpastei.

‘Hen? In panty?’

‘Ja, krekt geskikt foar sipels.’

Hy frommele de panty útelkoar en joech my de beide panty-fuotten. Sels hie er it panty-broekje beet.

‘Even toulûke, Dingeman. No gean ik der mei de neils oerhinne. In pear rillen is goed foar de fintilaasje.’

‘Mar in gelok dat ús mem it net sjocht.’

‘Wacht,’ sei Joazef, ‘ik help dy wol even mei de blêden. Dan dochsto aansent de sipels deryn.’

We draaiden se tegearre allegear de nekke om. Dêrnei gie Joazef yn 'e hûs.

Ik gie op 'e knibbels lizzen en rûgele de neakene sipels yn it panty-broekje. Sa no en dan kaam ik oerein om se nei ûnderen te skodzjen.

Doe't Joazef weromkaam mei in steapel bôle, hie ik beide fuotten oan de knibbels ta fol. By de lêste sipels hold Joazef it broekje iepen, en ik lade yn.

[pagina 79]
[p. 79]

‘Mefrou hat knobbelskonken,’ lake Joazef, ‘en sjoch, menear in boksernoas!’

Hy luts it panty-broekje oer de holle hinne (krekt in boef) en slingere de panty-fuotten op 'e rêch. Sa draafde er in rûntsje oer de tún. Ik wie slop fan laitsjen.

We brochten de sipels nei de skuorre. Joazef makke de panty oan in balke fêst. Dêr hong mefrou.

Op 'e tún ite fûn ik hearlik. De sinne skynde, en der waaide in lekker waarm wyntsje. Heech yn 'e loft gie in fleanmasine oer.

De bôle wie hurd en droech, mar Joazef hie der ekstra bûter en jam op smard. Ik hie noch altyd poerswarte hannen, mar noch noait hie iten my sa lekker smakke.

‘Ytsto thús ek safolle?’

‘Nee, mar it is hjir ek oars.’

‘Ja. Moarn sille we nije bôle bakke.’

‘Fynst it net akelich om alles allinnich te dwaan?’

‘Mar do helpst my toch?’

‘Ja, fan 'e wike. Mar normaal. Wolst gjin frou ha dy't dy helpe kin?’

‘Ik wit net,’ sei Joazef. Hy geat twa bekers molke yn.

‘Of hast noch noait ferlyfd op ien west?’

‘Jawol, mar dat is lang lyn.’

‘Dus sa komst oan dy panty. Mar wêrom bist dan no net mear ferlyfd?’

Joazef prakkesearde.

Op it lest sei er: ‘Ik bin altyd ferlyfd. Mar de lêste jierren mear op dingen as op minsken.’


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Gebruiksvoorwaarden/Terms of Use
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken