Skiplinks

  • Tekst
  • Verantwoording en downloads
  • Doorverwijzing en noten
Logo DBNL Ga naar de homepage
Logo DBNL

Hoofdmenu

  • Literatuur & taal
    • Auteurs
    • Beschikbare titels
    • Literatuur
    • Taalkunde
    • Collectie Limburg
    • Collectie Friesland
    • Collectie Suriname
    • Collectie Zuid-Afrika
  • Selecties
    • Collectie jeugdliteratuur
    • Basisbibliotheek
    • Tijdschriften/jaarboeken
    • Naslagwerken
    • Collectie e-books
    • Collectie publiek domein
    • Calendarium
    • Atlas
  • Periode
    • Middeleeuwen
    • Periode 1550-1700
    • Achttiende eeuw
    • Negentiende eeuw
    • Twintigste eeuw
    • Eenentwintigste eeuw
Dingeman krijt wjukken (1999)

Informatie terzijde

Titelpagina van Dingeman krijt wjukken
Afbeelding van Dingeman krijt wjukkenToon afbeelding van titelpagina van Dingeman krijt wjukken

  • Verantwoording
  • Inhoudsopgave

Downloads

XML (0.24 MB)

tekstbestand






Genre

jeugdliteratuur

Subgenre

roman


In samenwerking met:

(opent in nieuw venster)

© zie Auteursrecht en gebruiksvoorwaarden.

Dingeman krijt wjukken

(1999)–Eppie Dam–rechtenstatus Auteursrechtelijk beschermd

Vorige Volgende
[pagina 115]
[p. 115]

Haadstik 27
Ik rin troch it iepen fjild en praat mei in deade hazze

Doe't ik allinnich troch it iepen fjild rûn, begûn ik te prakkesearjen. Alle fragen dy't soms moarns en jûns by my op bêd kamen, gienen my no wer troch de holle hinne.

Wie it wol werklik sa dat ik by Joazef wie?

Of hie ik in ûngelok hân en wie ik út 'e tiid rekke? Lei ik yn koma en libbe ik al dagen yn in dream?

Of siet ik thús yn 'e garaazje en beelde ik my alles yn?

Of hie ik alles opskreaun en wie it in ferhaal?

Ik seach om my hinne.

De blommen dy't ik seach, koe ik út myn boeken: koweblomkes, hynsteblommen, bûterblommen, reade en wite klaver. Ik snúfde. Ik woe witte of ik se rûke koe.

De fûgels dy't ik seach, koe ik fan plaatsjes. Ik herkende ljippen, strânljippen, in skries. Mar wienen se ek echt? Ik bûgde my en krige in fearke op dat yn it gers lei. Ik struts my der mei oer de rêch fan de hân. It kidele.

Ik seach foar my út.

Foar my lei de stêd dy't ik al sjoen hie út de Klimkalefater wei. Nee, it wie ús stêd net. It koe net oars, ik wie by Joazef. Mar dat rôp wer oare fragen op.

Wêrom hie er my hjirhinne helle?

Wêrom dy frjemde brief mei ‘Roosje Hoppe’?

Kloppe dat ferhaal fan de pylkjes en de dobbelstiennen?

En hoe kaam it dat ik hjir allinnich wie?

Ynienen bleau ik stilstean, midden yn it iepen fjild. Ik die de holle achteroer en snúfde alles yn my op. Alle fragen gienen by

[pagina 116]
[p. 116]

my wei. Want fan alle fragen dy't ik hie, woe ik mar op ien it antwurd witte:

Hoe lang soe ik hjir noch bliuwe?

Ik wist fansels wol hoe lang. Moandei soe de sjauffeur wer mei syn giele taksy komme. Swart pak en wite moffen oan. Miskien soe ik wol wer dreame ûnderweis (dreame fan Joazef en syn buorkerij), mar dêrnei soe ik wekker wurde by it saaiste hûs fan de stêd. Myn hûs. Us stêd.

Ik rûn fierder.

Dêr yn 'e ûnderwâl seach ik wat lizzen. It wie in hazze. In deade hazze.

Ik knibbele by him del en struts him oer it neakene feltsje. It fielde oan as hurd kerton. Hy hie gjin eagen mear, mar syn tosken koe ik sjen. It wie krekt as lake er.

‘Hoi, hazze. Leist hjir al lang?’

- Wat is lang.

- Lang genôch om dea te wêzen.

- Bin ik dan dea?

- Ja, witst dat dan net?

- Ik hie it ferskil noch net murken.

- Is it dan net slim om dea te wêzen?

- Ik soe net witte wêrom.

- Hoppe giet ek dea, Joazef hat it sein.

- Wa is Hoppe? En wa is Joazef?

- Hoppe is in hynder.

- Ja, dan giet er dea. En Joazef?

- Joazef is in minske.

- Dan giet hy ek dea.

- Ik gean ek dea, hen?

- Bisto in minske?

- Ja, mar ik bin noch jong.

[pagina 117]
[p. 117]

- Dan moatst earst libje. Letter giest dea.

- Wiesto âld doest deagiest?

- Hiel âld. Ik wie al tsien.

- Ik bin ek tsien.

- Mar do bist gjin hazze.

- Hoppe is tweintich.

- Mar Hoppe is in hynder.

- Dus dea wêze is net slim?

- Nee, dêr hoechst net bang foar te wêzen.

- Dan sis ik dat tsjin Hoppe, goed?

- Sis dat mar tsjin Hoppe.

- Dat it hielendal net slim is, hen?

- Nee, ik bin der net oars fan wurden.

‘No hoi, hazze. Ik gean wer nei de buorkerij, hear.’

Sûnder fragen en sûnder gedachten rûn ik werom. Ik seach nei de blommen en de fûgels. Ik koe se sjen, ik koe se hearre. Alles yn it fjild wie te rûken en te fielen.

Alles wie echt.


Vorige Volgende

Footer navigatie

Logo DBNL Logo DBNL

Over DBNL

  • Wat is DBNL?
  • Over ons
  • Selectie- en editieverantwoording

Voor gebruikers

  • Gebruiksvoorwaarden/Terms of Use
  • Informatie voor rechthebbenden
  • Disclaimer
  • Privacy
  • Toegankelijkheid

Contact

  • Contactformulier
  • Veelgestelde vragen
  • Vacatures
Logo DBNL

Partners

Ga naar kb.nl logo KB
Ga naar taalunie.org logo TaalUnie
Ga naar vlaamse-erfgoedbibliotheken.be logo Vlaamse Erfgoedbibliotheken