Occasio arrepta. Neglecta

Schema V.
Tempus & Occasionem Prudentes studiosè obseruant.

Angelus, Diaboli, Tempus, Occasio, Drusillus, Darotistus, Storia, Mirandulus, Tornus.

Ang.

ECce, vt se vestris laetè conspectibus alter
Grex offert iuuenum! maior spes fulget in istis.
O Juuenes! vobis iamnunc datur esse beatis.

[p. 290]

 

Vos sapite; atque aliis spretum ne temnite Numen.

 

Eia igitur, dum Tempvs adest, Occasio dum se

 

Oggerit, immensos componite laudis aceruos

 

Virtute & studiis: aderit fauor aetheris alti.

 

1. Diab.

 

Non opis est vestrae tantis onerare cerebrum

 

Solicitvdinibvs.

 

2. Diab.

 

Iuuenilia voluite coepta.

 

Ang.

 

J procul, impostor coluber suasorque malorum:

 

Non sunt hi praeda apta tuis fera belua technis.

 

Temp.

 

O clari ingeniis iuuenes! En, nobile pignus

 

Tempvs ego, soror & germana Occasio, vestris

 

Seruitiis laeti offerimus nos nostraque.

 

Occas.

 

Vobis

 

Si quis amor nostri, vel si vos cura salutis

 

Vlla tenet; magnam paruo pòst tempore messem

 

Proferet, & rutili statuet super atria caeli.

 

Drusill.

 

Hospes gratus ades.

 

Darot.

 

Prô, quàm tua lumina laeti

 

Adspicimus!

 

Storia.

 

Quàm tu nostris Occasio ocellis

 

Exoptata venis!

 

Mirand.

 

Quàm te tardante dolemus!

 

Torn.

 

Obsecro, pace tuâ, liceat mihi dulciter istos

 

Tempvs in amplexus ruere.

 

Temp.

 

O mihi cara Iuuentus!

 

Drusill.

 

Cedo manum, & fidos amplectere fida clientes.

 

Occas.

 

Vivite.

 

Darot.

 

Siqua mones, stamus parêre parati.

 

Ang.

 

Gratus hic est animi candor: placet ista voluntas.

 

Temp.

 

Quàm nec in immemores fauor hic se impenderis; olim,

 

Quando frui nostrâ dabitur mercede, scietis.

 

Stor.

 

Nos vestra exhilarat praesentia, sermo, venustas.

 

Mirand.

 

Nec labor est vllus.

 

Torn.

 

Nihil est quod iure molestet,

 

Quod vestro obsequio vel cedere possit honori.