Eduard de Dene. Testament rhetoricael

Blende lien gasthuus

De Cappelle inde lane vanden blende lien
heeft my voormaels soberlick ghedocht voorzien
nietmin / men zalder noch mueghen me Lyen
de blende en connender niet wel naer zien
ick hebber eens Een blende weten zien zien
te wylent ick eyers daer zach / zien zien zien
ende tzaeghen oock meer dan acht of thien lyen
der Cappelle ionick voorzien van waslichte
en de blende By donckere een sterck ghezichte

Maer vp dat de ghasthuus blende lyen / zyn gheen claghers
byder macht die ick hebbe vader Lantheerne
Lichtelick mochtense ghecryghen wat maghers
Ick gheef hemlieden tvrydom vanden zaeghers
al zynder ledichaerts / zy zaghen gheerne

Blenden oliuier dorganiste playsant
naer tspelen onser vrauwen lof ter potterien
een qua knecht stack hem eens een doo mol in dhandt
hy greepse voor een muus / maer als hy creech verstandt
zichtent dien tydt / mochte gheen quae knechten ghezien