Eduard de Dene. Testament rhetoricael

[p. 7]

⁺Aucteur

Procederende by oordene ten besten tzy doenlick
ne wild ick van mynen testamente stateren
maer eeneghe myn vriendekens ionstich Coenlick
oock van Rhetorica wat mede stofferen
daer naer testamentelick voorts Legateren
ende ordonneren
diueerssche staeten van mensschen / Elck een Refereyn
vp datser inne mochten zomtyds Contempleren
ende speculeren
der naer wandelende naer den besten treyn
Al ghemaect by my Binnen tbrugsche pleyn
zom tanderen tyden in voorleden termyne
maer omme den gheest verblyden certeyn
meest nieuwe ghemaect Te desen fine
ken hebbe niet om gheuen huut kiste of schryne
van ghelde of ander testamentelicke iuweelen
maer van Rhetorica conste al wast my Pine
elck tzyne // By desen testamente zou deelen
zo waer der yet crepelt / vvillet Rechtelick heelen /

⁺ Eerst in memorien / wylent myne Beminde
mebroeders / daer ick mede frequenteirde
elck huerer / tot Rhetorica de ghezinde
end in wien oock de conste / Constich floreirde
Bem ghevveist daer toe de ghemoueirde
eeneghe Een Epithaphium tschynckene
elck in zyn oorden^* / zoo hy der weerelt passeerde
vpdatmen hemlieden / mach zyn ghedynckende

+ 150 v

+ 151 r

* ‘oorden’: eerste ‘o’ over andere letter (r?).