Eduard de Dene. Testament rhetoricael

Aucteur Tot alle ghulseghe

Ghy ghulseghe zacken naer ghetempertheyt keert
hoort wat ons een heydensch philosophe Leert⁺
tes wel een beeste zeght hy tdien stonde
de ghuene die de wille volght van zynen monde
ende wie hem vervult met spys ende dranck
die zouct meer zyn dood / dan tleuen eer Lanck
ypocras beschryft ons oock tonsen bewyse
dat ouervloedicheyt van dranck ende spyse
Bederft ziele Lichaem / end alle duechden
En pytagoras Regule / in tsleuens iuechden
was eten dryncken / ende spreken by maeten
tfy hu ghulseghen buuck bespugher der straeten
schaemt hu / die wilt nochtans christenlick leuen
Talder eerste ghebod Ter weerelt beseuen
dat god almachtich wilde den mensschen gheuen⁺
verbood hy de ghulsicheyt zoo wy Lesen
van alle boomen des paradys / sprack hy mids desen
zult ghy etende wesen
maer vanden boom der kennessen deedhy bediet
des goets ende quaets zult ghy eten Niet
⁺ want wat dach / ghy daer of zult eten verwerfuen
sprack god tot Adam de doodt zult ghy sterfuen
maer adam en gheloofdet niet / als donwyse
dies wierdt hy gheiaeght huten Paradyse
vvant Ieghens god ghebod / hy ghulsich sneifde
maer zo langhen tydt als hyder in Leifde
in soberheyt / in gloryen was zyn besluut
end als hy at van tsheeren verboden Fruut
wasser huutgheworpen in tdal van weene
Ouerpeynst dit ghulseghe int ghemeene

+ Aristo

+ Genesi.2.

+ 336 r