Eduard de Dene. Testament rhetoricael

Aucteur

TVerdriet my heere // zeere dit verghanglick leuen
ende dese onghevalleghe Pilgrimaidge
dit leuen als een aerm cort leuen bescreuen
ommevallende ende zieckzuchtich beseuen
onzeker aerbeydelick ende vul quellaige
besmet bevlect onReyn in tsweerelts passaige
Een leuen als een vrauwe des quaets ten fine
conyghinne dhoueerdighen hooghe Couraidge
vul dwalynghe ketyfuicheyt ellende Pine
twelck gheen leuen behoorste gheseyt te zyne
maer de doodt in welck Leuen al tsamen dat wy
In een oogheblick tyds steruen / ghaen te Ruine
duer veel diueerssche ghebreken ons tselfs onvry
mids veel manieren des doods / ons commende by
O menssche ghedynct lettel hebbende ghedaen // goet
sterft eer ghy sterft / hoe iuechdich dyn vpgroeysel zy
Ziet hoe dit leuen Als een blomme verghaen // moet

Tsmensschens leuen vpder eerden es eenen stryd
ghenought hu met nootdurst ende dexelcleeren
Menssche ghedynct dat ghy asschene zyt
Ende zult wederomme in asschene verkeeren /

⁺ Daer en es niet zekerder dan de doodt

gheen medelyden heeft ze metten Aermen

de Rycke en bewystze gheen eere groot

want vp gheen van beeden en heeftze ontfaermen

+ 397 r