De warachtighe fabulen der dieren

[p. 184]

[Vos ende Houaere]

Die beghect en ander wt-strijct,

Sal worden beghect, alzoot blijct.

Eccli. 7.

EN beghect gheen mensche t'gheender stede
In bitterhede, zijnder zielen niet:
Want daer es eene
Ouer al ghemeene
Die verheft ende vernedert mede
God almachtich, diet alomme ziet.

Prouerb. 3.

ALle bespotter ofte ghecker, waer hy keere
Es afgrijselickhede God den Heere
Sal dies de schimpers bespotten int leuen
Ende sal de zaechtmoedighe gratie gheuen.

[p. 185]

Vos ende Houaere.

DEn leeploosen Vos vul pitsen by costume
Heeft den Houaere voort ghestelt een bancket
Een lecker sopolorum gherecht int rume
En op een platte telioor den Houaer voort ghestelt
Maer hy en conster niet wt crijghen magher noch vet
Met zyn beck reckhalsende, hem en baette gheen rapen,
t'Vos smeerdet al vp, zuuer ende net
En den Houaer mocht ouer eynde staen gapen:
Docht oock, ick sal v noch wel betraepen
Al moet ick nv met hongher my gaen vermeyden, dan,
Tis een aerm Bailliu, die zyn boete niet verbeyden, can.

¶ Den Vos s'Houaers ghenoodt zijnde op een ander pas

Verbeyde vullen bras,
De spijse gherecht wiert aldaer ter plecken
In een wijdbuuckich lanck nau vyool glas
Daer d'Houaer wt ende in reckhalsende was:
Maer den Vos conster een ijnckel beetken wt trecken
t'Glas mocht hy van buten en niet van binnen lecken:
De spijse scheen voor hem maer staende ten tooghe,
Den Houaer ghijngh weder naer een mockaey recken
En den Vos moest hongher lijden daer by ghedooghe,
Hy namt schimpich hooghe // al wast hem pijne:
Die schimpt, moet verwachten beschimpt te zijne

Insghelijcx niemant can zoo loos wesen

Hy en wort naer desen
Wel bedroghen, alzoo hy heeft zelue ghedaen
Niemant zoo hoogh oock in staete gheresen
Ofte wijs ghepresen:
Die schimpich bedroch, altijts zou ontghaen.