Logo DBNL
Refreinenbundel (1940)

Refreinenbundel

(1940)–Jan van Doesborch–rechtenstatus Auteursrecht onbekend

Vorige Volgende

[XLV] Refreyn

 
O Mijn hertelic troost mijn toeuerlaet,
 
helpt mi, gheeft raet dat ic troost gewinne,
 
v oochskens eens vriendelic doch op mi slaet
 
want ghi bouen alle anderen ghesloten staet
5
inden hoochsten graet mijnder herten binnen.
 
therte slaet tuwaerts in vierigher minnen,
 
wat sal ic beghinnen ic bens niet cont.
 
mach ic niet corts uwen troost ghewinnen
 
so moet ic mijn sinnen verliesen terstont.
10
ic ben bedruct tot inden gront
 
dus maect mi ghesont, als liefs lijen plegen. vs. 11
 
v lieflijc opsien, uwen roden mont,
 
mach mi dien worden, dats mi een vont, vs. 13
 
so heb ic recht troost van lieue ghecreghen.
 
 
15
Lief alderliefste, nu staet mi by,
 
denct doch op mi alle oghenblicke,
 
want waer ic ben therte is bi dy,
 
+ dus bliuic v eyghen, mijns selfs onvry.
 
ic ben doch ghi, en ghi bent icke,
20
al mijn ghepeys ic tuwaert schicke,
 
denct in geenen sticke dat mijn ia mijn neen is,
 
want met ganscher herten ic verschricke
 
als ic dencke dicke dat v herte in ween is.
 
alle vruecht sonder v dunct mi dat cleen is
25
mits dat therte reen is tot v geneghen,
 
maect dat lijf en goet tsamen ghemeen is,
 
v herte en tmijne maect dattet een is,
 
so heb ic recht troost van lieue vercreghen.
 
 
 
Sijt mijns genadich als vrient getrouwe,
30
boet mijnen rouwe ghi hebt die macht.
 
waer di mijns ghehuldich so ic v souwe, vs. 31
 
al waer al die werelt mijn root van gouwe
 
ic maecte v vrouwe, sijt corts bedacht.
 
ic en can gherusten tsi dach oft nacht,
35
dat heeft liefde ghewracht so Venus geboot.
 
v vriendelicheyt heeft mi int lijden bracht
 
dwelc ghi cleen acht, dies therte lijdt stoot.
 
laet ghi mi nv in dit lijden groot
 
en troost ghi mi niet corts, so weetic bloot
40
+ dat ic blijf doot, wat batet versweghen;
 
maer wildi mi helpen wt deser noot
 
so laet mi rusten in uwen schoot,
 
so had ic recht troost van lieue ghecregen.
 
 
 
Princesse
 
Mijn lijden waer heel ghewroken
45
lage ic eens ghedoken in v armkens blanck,
 
en dat ic daer mocht ligghen soken vs. 46
 
tusschen v borstkens spelen en token, vs. 47
 
vriendelic gheloken in Venus bedwanck,
 
en dat der nacht waer .x. nachten lanck
50
en dair spijs en dranc ware soot hoort te sine,
 
alderhande genuechten en snaerspel geclanck,
 
musike en sanck, planteyt van wijne,
 
en wel waer versekert van nijders fenijne,
 
dat waer een boete een medecijne
55
voor Venus pijne; waert my so geleghen
 
en mocht drucken v herteken vast aen dmijne,
 
so had ic recht troost van lieue ghecregen.

Vorige Volgende