Logo DBNL
Refreinenbundel (1940)

Refreinenbundel

(1940)–Jan van Doesborch–rechtenstatus Auteursrecht onbekend

Vorige Volgende

[LXXXVI]

Gheselscap sal voor goet ghebreken

Refreyn

 
GEselscap sal voor goet doch falen,
 
Waer om so willen wi trueren om goet?
 
Wat baet ghierich ghecrigen oft halen,
 
Elc is doch seker dat hi steruen moet.
5
+ Goet oft scat en is gheen steruens boet,
 
Men siet die rijcke so wel in deerde steken
 
Als de arme, dus seg ic, ic bens wel vroet:
 
Gheselscap sal voor goet ghebreken.
 
Al sterft de rijcke, sijn goet blijft hier;
10
Wat heeft hi dan des goets te bet?
 
Sijn siele die vaert int eewige vier
 
Eest dan qualic ghecregen, doet hi geen beset vs. 12
 
Van restoore, so dat hem plet vs. 13
 
Squaets genoech, also die priesters preken.
15
Ghiericheyt is der duechden belet,
 
Gheselscap sal voor goet ghebreken.
 
 
 
Al heb ick luttel, ick bin ghepayt
 
Met dat ick hebbe en wil niet sorgen.
 
Tis misselic hoe dat den cloot noch drayt,
20
Heb ick gheen gelt men sal mi borgen.
 
Aen eenen bast moet mense verworgen
 
Die coen op haerder vrecheyt spreken
 
Ende altoos peysen op eenen morgen;
 
Gheselscap sal voor goet ghebreken.
 
 
25
Ick hebbe ghenoech aen een habijt
 
Tot mijnen lijue tottet si versleten,
 
+ Want ick hebbe ghenen sekeren tijt:
 
Leef ick heden, morgen bin ick verbeten
 
Vanden beesten; so wil ick drincken en eeten
30
Die wile dat mi lust, maenden en weken,
 
Want ic segge om trechte waer te meten:
 
Gheselscap sal voor goet ghebreken.
 
 
 
Prince
 
Den ghierigen sack en is gheen tijt vul,
 
Om hebben so staet hi altijt open.
35
Mi dunct si sijn al rasende dul
 
Die om vergaderen na tgoet dus lopen
 
Ende niet en doruen haer voetsel copen,
 
Nochtans de slechte houden si verbleken. vs. 38
 
Al heb ick luttel, ick leue op hopen:
40
Gheselscap sal voor goet ghebreken.

Vorige Volgende