Logo DBNL
Refreinenbundel (1940)

Refreinenbundel

(1940)–Jan van Doesborch–rechtenstatus Auteursrecht onbekend

Vorige Volgende

[CI] [CI]

Eenen sack vol moren, een stinckende prije

Refreyn

 
O Menschelic pac vol stinckender houeerde,
 
Brosch lichaem, vuyl sac vol moren wiens werde
 
+ Is alte cleyn als tleuen verscheyen es,
 
Du biste seer wack, haest die verteerde, vs. 4
5
Twi soecti ghemack dan so seer op deerde,
 
Ick seg certeyn dat tsviants verleyen es;
 
Weeldich voedi tlichaem dat een verbeyen es
 
Van drucke, contrarie der sielen claer,
 
Want houerdije een recht bereyen es
10
Om veruult tzijn metten seuen dootsonden swaer.
 
Wat volchter dan naer? verdriet, anxt ende vaer;
 
Dat lichaem misdoet wort geweten met nije
 
Der sielen voorwaer, dus seggic eenpaer:
 
Als de siele scheyt blijfdi so ick belije
15
Eenen sack vol moren, een stinckende prije.
 
 
 
Een houerdich vat is voor gode stinckende
 
So walgelic, dat door dien is minckende
 
Die gracie die ons god soude verleenen.
 
Wat helpt ons den scat als ons is crinckende
20
De doot? niet, dats plat, dus sijt v bedinckende, vs. 20
 
Die spacie is hier, hebt duechdelic meenen, vs. 21
 
Volcht den coninc van Iuda int beweenen
 
Der sonden, dinct hoe nabugodonosor was
 
Door sijn houerdije van gode tot eenen
25
+ Beeste verschepen die namaels ghenas
 
Duer tberou dat ras hem cureerde so ic las.
 
De dit tlichaem, wat achti dan houerdie; vs. 27
 
Gaert duecht op elc pas, al slichaems gebras vs. 28
 
Es min dan niet, doot sijnde so blijft ghije
30
Eenen sack vol moren, een stinckende prije.
 
 
 
Wat wildi cleeden tlichaem met grau ende bont,
 
Ghi moet doch scheden; al schijndi nv gesont
 
Tis haest verkeert alst gode belieft.
 
Ghi doet bereeden leckernije voor den mont,
35
Solaesheit breeden twelc de siele doorwont,
 
Dus blijft verseert die siele en ghegrieft.
 
Wat baet dat ghi v noch so seer verhieft,
 
Die doot sal de siele wten lichaem drijuen
 
Die ten hemel of ter hellen, dats cort gebrieft,
40
Na verdiente moet varen, ten baet geen kijuen
 
Want hier geen bliuen en is so ons scriuen
 
Alle doctoren, en wi sient ooc telcken tije.
 
Wat sijn die lijuen der sondiger katijuen
 
Voor gode gerekent dan aen elcken zije
45
Eenen sack vol moren, een stinckende prije.
 
 
 
Prince
 
+ Dlichaem vol sonden is eenen sac vol moren.
 
Die tallen stonden dat hier houwen vercoren,
 
Die sijn veel meer met vuylheden besmet
 
Om vray orconden, dan zwinen die sporen vs. 49
50
Tvuyl te doorgronden; dus blijft verloren
 
Deedel siele die van gode is gheset
 
Bi dlichaem als een wtuercoren let.
 
Dus acht tlichaem cleyn maer de siele groot,
 
Ouerdenckende dijn vier wterste altemet, vs. 54
55
Die helle, doordel, hemelrijc ende doot.
 
Doet dit, tis noot, want als ghi sijt bloot
 
Sonder siele ende v die wormen te strije
 
Sullen doen aenstoot, doorknagende tconroot, vs. 58
 
So en werdi mer gerekent inden aertscen crije vs. 59
60
Eenen sack vol moren, een stinckende prije.

Vorige Volgende