Exordium magnum

van en brueder de versumet hadde ene sunde te bichten

Op ene tyt was ene groete sterfte inden cloester gheheten dat groete wolt onder den eersamen vader poncio die namaels abbet was toe clarendaer (l. clarendael) Inden cloester was een conuers siec gheheten stephanus die om begherte te steruen nauwe enige spise nemen en wolde. mer mit stedighen begherten ende suchten bad hie dat hie mochte wtgheleit werden wt den kerker des swaren ellendes der kinderen adaems. het is gheschiet dat die here hem ghegeuen heuet die begherte sins herten. Doe die siekenwaerre die hem stedelic ghedient hadde sach dat he mit soe groeter ynnicheit ende ruste des herten starf soe waert hie oec seer ontsteken mit begherte des steruens. ende sechde tot hem Alre liefste brueder want ic sie dattu te hantes verloest salste werden. van die arme onsalicheit deser weerlt. ende dattu salichliken ingheleit salste werden in die blytschap dins heren. soe bid ic dat wanner du coemeste

[p. 30]

tot onsen alre suetsten heren ihsum xpistum my verweruen wilste van sinre guedertierenheit dat ic kortelike van hier moeghe varen. hie antwoerde dat hie hem helpen wolde indien dattet hem gheoerlouet were. Doe voerby ghegaen weren luttel dagen nae des brueders dode. apenbaerde hie den seluen sieken waerre in enen visione ende sechde tot hem. Sie ic bin in vreden ontfangen vanden heren. Ic sie die guede des heren inden lande der leuender. die sonder enige ghelikenysse boeuen gaen alle ghenuechte des vleisches ende des bloedes. ende nu want icket dy gheloeuet hadde soe come ic toe dy hulpe dy toe brenghen. nochtans die hulpe niet die du onbehoedelike ghebeden hebste. mer die ic bekent hebbe dy orberliker toe wesen. weder dencke want doe du noch inder weerlt weerste dattu die alsulke sunde dedeste daer du niet af ontbonden en biste ouermids rouwe des herten ende bichte des mondes. daerom bichte ende doe haestelike penitencie. want ist saeke dat dese sunde niet afghewasschen en wort voer die doet ouermids bichte soe sal sie naeder doet ononbindelike bliuen. Die brueder waert ontwaken ende toech ter herten die groeue sunde die hie ouer twelef iaren ghedaen hadde. mer sie was alte male wt sinre memorien gheuallen. hie haestede verloeset te werden bichtende ende voldoende ende gode danckende bekande hie apenbaerlike dat die hulpe der hilligen niet te vergheues ghebeden en wort. ende dat dat sacrament des bichtes niet cleyn te achten en is sonder welken oec alsulke onbekantenysse der menschen gheweten werden of toe ghegeuen werden