|
| |
| |
| |
Praestantissimo juveni Petro Leonardo Schippers, habita de moderamine inculpatae tutelae oratione, academiam adeunti.
Omnibus ignotae mortis timor, omnibus hostem,
Praesidiumque datum sentire, & noscere teli
Vimque modumque sui.
Ovid: Halieut: vs 7.
Alma Parens rerum, Moderatrix optima rerum,
Natura, arbitrio quae regit omne suo,
Armat in armatos, innatis viribus, hostes,
Quidquid alit tellus, quidquid alit pelagus.
Spumantem indomitis addit Leo viribus iram,
Inperiumque ferox per nemus omne tenet.
Terribiles pedibus, longaque proboscide Barri:
Rhinoceros nasum, quo timeatur, habet.
| |
| |
Tygridas inflammat rigidi fiducia dentis:
Horrida vulnificis unguibus Ursa furit.
Ecce Draco, rutilis obductus tergora squammis,
Sibilat, & mixtum sanguine virus agit.
Callida laudatur vafrae fallacia Vulpis:
Fulmineo vastans ore timendus Aper.
Ardua praesidium valido sunt cornua Tauro:
Duraque magnanimos ungula servat Equos.
Et Lepus in silvis, & Cervus, Damaque cursu
Eripitur cupido, praeda petita, Cani.
Mustelae horrendos audacia provocat Hydros:
Adrectis pennis, tutus, Echine, lates.
Parvulus Ichneumon stertentis repit in alvum,
Incautus somnos dum Crocodilus agit.
Letiferum caudae vulnus dat Scorpios ictu:
Tactus Arachnaea cuspide, Bufo perit.
Sunt etiam insidiae, sunt fervida praelia ponto;
Armatum armatus Marte vel arte petit.
Majestas toto Reges facit aequore Cetos:
Delphini rostrum coerula turba timet.
Muraena infestos obpugnat morsibus hostes:
Et Xiphiae longus, quo valet, ensis adest.
Aufugiunt timidi, visa Loligine, pisces,
Quae nigrum in niveo corpore virus habet.
Ut magnes ferrum, mira sic arte natantes
Torpedo, stupidos adtonitosque, trahit.
| |
| |
Sepia, tarda fugae, fuscum vomit ore venenum,
Evaditque avidas, sic bene tecta, manus.
Vimina continuo diducens verbere caudae,
Fallentes fallit calliditate Scarus.
Captus rete Lupus saltu supereminet alto:
Anthias, obverso corpore, lina secat.
Adjacet & scopulis Polypus, variatque colorem,
Quamque lapis saxum, tam manet ipse lapis.
Thynnida quid referam timidum, fortemve Zygaenam,
Nominave, in numeros vix satis apta meos?
Ipsae etiam, varios ducentes aëre gyros,
Arma, suus, volucres, qûis cadat hostis, habent.
Maxima laus Aquilae; jactatis inpigra pennis,
Plumiferum curvo territat ore genus.
Ad lapidis sonitum, quem cautus continet unguis,
Defendunt, vigiles, castra locata Grues.
Adcipiter rigidis violentus vivit in armis:
Ardea versutis ingeniosa dolis.
Incolumem peragit pietate Ciconia vitam,
Nec timet hostiles, in sua fata, manus.
Chaonias inplet Falco terrore volucres:
Bubo capit tutos, nocte silente, cibos.
Rex Nisus quomdam, fulvis Halyaeëtos alis,
Dilacerat pavidas unguibus acer aves.
Exstruit Halcyone pendentes aequore nidos,
Frigida quum, positis fluctibus, unda silet.
| |
| |
Scilicet illa, memor venti, casusque mariti,
Non audet tumidis credere corpus aquis.
Devitant Upupam Philomela Sororque minacem,
Dum tremula cae$um voce queruntur Ityn.
Quumque igitur pecori tellus & pontus & aër
Arma ministrat; Homo solus inermis erit?
Non ita! sunt enses, & acutae cuspidis hastae,
Sunt clypei, & variis tela vibranda modis.
His instructa, suam defendat dextera vitam,
Marte tamen cauto, cum ratione tamen.
Hoc, Schippere, doces, blandae modulamin linguae,
Hoc docet argutis pagina scripta notis.
Tempora dum lauru cincitus, resonante cathedra,
Victor Iö laeta voce Triumphe canis.
Altera parta Tibi est Victoria, & altera restat,
Qua culta est Pallas, arte colenda Themis.
Rumpe moras, celeri felix pete moenia cursu,
Qua prope dulcisonis Vechta superbit aquis.
Sed tamen, ante Deae subeas quam Templa severae,
Utere praeceptis, utere, Amice, meis.
Est Gens, quae, ficta pietatis imagine, multis
Insidiasque struit, perniciemque parat.
Cui caput incurvae dependet arundinis instar,
Callida dum terrae lumina fixa tenet.
Nunc querulos imo gemitus de pectore promit,
Nunc ciet invitis flumina larga genis.
| |
| |
Ingenia obpugnat Lernaeis libera telis,
Et damnat licitos inperiosa jocos.
Dira Superstitio est: falso pietatis amictu,
Decipit illa homines, decipit illa Deos.
Altera Gens Veneri sacra est, & dedita Baccho:
Hanc fugit adtonito Turba Novena metu.
Sunt etenim castae, Parnasia Numina, Nymphae,
Nec facit ad teneras rixa vel ira manus.
Ensibus o! quotiens silices sunt verbera passi,
Aut subiere feram stipite via necem!
Sic malesanus amor damnum inreparabile famae,
Pocula vel nimio plena dedere mero.
Cautus utramque cave; (verum mihi crede fatenti)
Haec Tibi Scylla rapax, illa Charybdis erit.
Mascula sed potius Pietas & Mascula Virtus
Delectent animum, quae bona summa, Tuum.
Candida Simplicitas fidos Tibi quaerat amicos,
Et Sophiae sacrum liberioris opus.
Sic Themis ipsa Tuis, numquam contraria, votis
Adnuat, in celebri Te celebretque foro.
Sic Tua Fama novo titulorum crescat honore:
Sic faveat numeris Calliopea Tuis.
Sic, velut Alcides variarum monstra ferarum,
Conculces pedibus Tempus & Invidiam.
|
|
Auteursrechtvrij