De droeve, ende blyde wereldt

Behelsende vele treurighe gheschiedenissen, belacchelycke kluchten, heerlycke leeringen, ende andere ongemeene aerdigheden

Exempels van gheloofweerdighe, ende daer beneffens oock van valsche menschen.

DOen den Keyser Augustus over de gheluckighe Victorie van Antonius ende Cleopatra triumpheerde, wiert een Ægyptisch Priester in de Stadt van Roomen ghebraght: van desen Man wiert gheseyt, dat hy sijn leven

[p. 218]

langh niet meer dan eens gheloghen, ende de waerheydt ghespaert hadde. Den Raedt door dit goet gherucht bewoghen, heeft onder malkander besloten, hem niet alleenlijck op vrye voeten te stellen, maer oock tot hooghe Priesterlijcke digniteyten te verheffen, jae heeft een Pilaer tot sijner eeren oprechten laten.

Daer-en-teghen schryft Spartiatus, dat ten tyden des Keysers Claudii een Romeyn, met name Pamphilus, ghestorven is, van welcke men terstont naer sijn afscheyden uytstroyden, dat hy in den tijt sijns levens niet een waer woort hadde laten uyt sijn mondt gaen, weshalven den Keyser een ghebodt liet uytgaen, dat men deses Pamphili lichaem niet soude begraven, maer sijn goedt confiskeren, sijn huys afbreken, sijn Vrouw ende kinderen uyt de Stadt verdryven, ende al het syne verwoesten, op dat van desen mensch niet meer souden ghesproken

[p. 219]

worden. Hier uyt is te sien, dat, oft schoon de Romeynen en de Ægyptenaren qualyck met malkander stonden, sy evenwel de waerheyt gelooft, bemint ende gheacht, de leughens daer en teghen ghelastert, ghehaet ende ghestraft hebben: ja dat meer is, sy hebben haere vyanden tot een ghedachtenis een Colomme laten oprechten, daer sy ter contrarie haer eyghen mede-borghers niet hebbe willen vergunnen, dat sy mochten ter aerde bestelt worden.