Archives ou correspondance inédite de la maison d'Orange-Nassau (première série). Tome I 1552-1565

Lettre LXI.
Le Prince d'Orange au Comte Louis de Nassau. Affaires de famille.

Mon frere. J'ay receu vostre lettre et entendu par icelle, ce que avés besoigné avecque M^r de Nuenar. Je suis esté bien émervillé de la responce qu'il vous at donné et de veoir le peu d'affection qu'il at de en faire une fin. Pour vous dire la vérité, je n'en suis pas trop content de veoir nostre povre seur, après avoir tant souffert avecque luy, de demerer ainsi déproveu, sans sçavoir ce qu'il en serat; et certes je ne le passerois ainsi, si je ne cognoissois le personaige avecque lequel nous avons affair: enfin il fault avoir la pacience jusques à votre retour, et veoir que résolution qu'il prenderat allors, et si allors il faict du froid, il nous vault regarder ce que aurons affaire, car se nous seroit à tous une grande honte et déréputation de abandoner ainsi nostre seur.... Depuis vostre partement l'on m'at adverti, comme la fraucken¹ van Giefre et² empéché pour chercher ung héritier et qu'el se at lessé dire, que, combien que les Contes d'Empde et ceulx de Olden-

1 dame, femme: Holl. vrouwtje (?).

2 est.

[p. 174]

⁺bourg luy sont bien proches, néamoings que, si la fille aîné du feu Conte de Rittberge eusse épousé ung Seigneur de bonne maison et qu'il ne fusse pas d'ung ceur tirannique, qu'elle aimeroit mieulx à celluy lesser son bien que non pas à person aultre. Je ne fais certes nulle doubte que, si peussiés parvenir au dit mariage de Rittberghe, que l'on porroit bien traicter avecq la vielle pusselle de Giefre qu'el vous fisse son hériter, et comme c'est chose de si gran importance pour vous et pour nous tous, que je le vous ay bien volu advertir; affin que vous ne vous endormissiés au dit affaire et que pensé sur tous moiens possible, comme porriés parvenir au dit mariage: de ma part je ne dormiray pas et penseray sur tous moiens, dont il me semble que nous porront aider à parvenir à nostre prétencion. Je aurois espoir que, si le Lantgrave voulusse faire ung tour d'ami et faire bon office devers la mère, que tout chose se porteroit bien, parquoy il fault que chercé¹ tous moiens pour le ganger. - Il me vient merveilleusement mal à propos que le Juif nous at failli de ce xx mille florins, pour les raisons que sçavés. Je amvoie de rechief mon sécretaire Alleman devers le dit Juif pour veoir s'il ne vauldroit délesser la condition de l'obligation par où il demande que mon frère Jéhan et vous aultres luy vauldriés donner certain hypothèque sur une terre à part, faisans les subjects et officiers serrement de se laisser exécuter, à faulte de paiement.... De Bréda, ce 15 d'octobre anno 1563.

Vostre bien bon et affectionné frère à vous obeir,

Guillaume de Nassau.

A Monsieur Louis de Nassau, mon bien ben frère.

+ 1563. Octobre.

1 cherchiez.