Archives ou correspondance inédite de la maison d'Orange-Nassau (première série). Tome I 1552-1565

[p. 261]

Lettre LXXXVI^a.
⁺Viglius au Cardinal de Granvelle. Menées de Renard; influence d'Armenteros (MS. B. GR. XII. p. 159).

Monseigneur ...... Je suis allé visiter par trois fois nostre Ambassadeur d'Angleterre⁽¹⁾ et l'ay une fois festoyé à disner; son instruction d'Espaigne fut par luy leue au Conseil, mais il délaissa la clause faisant mention de v.i.S., me disant après l'avoir fait pour non engendrer quelque jalousie envers les aultres Seigneurs et estoit, si je suis bien recordz¹, ladite instruction en la date du mois de janvier, que monstre bien sa grande diligence. Renard a esté par plusieurs fois vers luy, accompaigné de Castillanos, ou quelque aultre de cette génération, pour l'instruire, tant sur ce que luy pourra occurrer² en Angleterre, que des affaires de par deçà, ayant ledit Ambassadeur rendu³ paine vers les Seigneurs pour les entendre et en advertir sa M., et m'a compté son Alt. qu'il a fort à elle recommandé ledit Renard, le trouvant si qualifié et suffisant, et personaige de grand service, et avoit Mons^r d'Egmonde aussi mis en avant à son Alt. d'appeller au Conseil d'Estat ledit Renard, pour estre si bien imbeu des affaires d'Angleterre, mais son Alt. m'a dict de l'avoir rejecté, sur couleur de la desobéyssance qu'il monstroit à sa M. et que de soy-mesmes il avoit laissé le Conseil: et avec ceste conjoincture je adjousteray

+ 1564. Juin.

(1) Ambassadeur d'Angleterre. Apparemment un Espagnol: du moins Viglius écrit: ‘nous lui avons baillié... les pièces qu'il sçauroit avoir de besoing; reste qu'il les veuille revoir et prandre la paine de les entendre, puisque le tout est en langue Franchoise...’

1 si je me souviens bien.

2 arriver.

3 pris.

[p. 262]

⁺ung aultre poinct dudit Renard, qu'est que son Alt, devant-hier, comme elle me monstroit les lettres eseriptes à elle par sa M. en Espaignol, pour avoir mon advis sur aucuns poincts, en présence d'Armanteros, qui est quasi tousjours présent quant elle me parle d'affaires, l'on lisoit aussi l'article parlant dudit Renard, que contenoit en effet repétition de vostre advis et du mien à l'endroict la lettre que sa M. lui debvoit escripre, n'estant le mien aultre que de penser qu'il ne obéyroit point et ne tiendroit compte de luy oster ses estatz, sur la confidence de la protection des Seigneurs, et que, y ayant sa M. pensé, qu'elle estoit délibéré de l'appeller vers elle en Espaigne, soubz couleur d'estre par luy informé sur aucuns affaires concernans son service; et, comme elle me demandoit ce que me sambloit, luy respondis que ne povois estre d'aultre opinion que auparavant, et que je tenois pour certain qu'il ne se fieroit point, et qu'il estoit trop renard que de se laisser ainsi attirer en Espaigne, ayant trop d'excuses coulourées sur son indisposition, le loing chemin, et aultres causes aultrefois alléguées; néantmoins, si ainsi sambloit à sa M., qu'elle le pourroit essayer, et me retins de plus luy dire pour la présence d'Armenteros que je crainds n'estre si secret en mon endroit que je vouldrois, s'estant encoires naguères vanté le docteur Molinéus⁽¹⁾, qu'il sçait tout ce que je faiz, traicte et parle vers Madame, par le moyen dudit Armenteros et de son frère, et combien je cognois assés la légiereté de Molinéus, si ne suis hors de suspicion qu'il n'y soit quelque chose..... Bruxelles, 8 juin.

+ 1564 Juin.

(1) Molinéus. Voyez p. 116, in f.