Archives ou correspondance inédite de la maison d'Orange-Nassau (première série). Tome III 1567-1572

† Lettre CCLXV.
La Duchesse de Parme au Prince d'Orange. Elle insiste sur la prestation d'un nouveau serment. (Article d'ungne lettre de Madame escripte à Mons^r le Prince d'Orenges, datée du 6^me jour de mars l'an 1567 devant Pasques.)

Et comme le temps est venu présentement que tous bons ministres, vassaulx et subjects de sa Ma^té (chacun endroict soy) sont venuz démonstrer effectuellement le service qu'ils veullent faire à sa Ma^té et à la patrye, à quoy chacun est obligé, et d'aultant que la personne est plus grande et a plus de charge et gouvernement, d'aultant doibt elle démonstrer davantaige sa bonne volunté, sans laisser lieu à quelque suspition, ny diffidence, principalement en ung tel tamps si perplex, turbulent et confuz; Sa dite Ma^té a voulu et commandé par ses lettres

[p. 44]

⁺expresses, que eulx qui ont estat et charge, signament de gens de guerre, tous sans exception quelconque, renouvellassent le serment de bien et loyalement luy servir et obéyr en tous ses commandemens, sans aulcune restriction ou limitation, à peine que ceulx qui ne vouldriont faire et par serment, fussent, sans exception de personne et sans plus de mistère, cassez; à quoy, passé quelque temps, ces Seign^rs du Conseil, chevaliers de l'Ordre et capitaines de bandes d'ordonnance, estant les icy, ont satisfaict, comme ont faict aussy aulcuns autres. Par tant convient que vous, mon bon Cousin, pour le lieu que tenez en tant d'endroicts, faictes le mesme, comme pareillement suys délibérée faire faire à tous ayans charge, suyvant le commandement de sa Ma^té. Pour ceste cause je vous requiers et prie bien instamment par ceste, que pour satisfaire aux désirs et commandement de sa Ma^té et monstrer mesmement le chemin aux aultres moindres, vous veuillez renouveller incontinent le serment par escript (puis que n'estes venu icy pour le faire en mes mains) et le m'envoyer signé de vous, selon la forme que je vous envoye, sans y vouloir faire faulte. Quoy faisant vous donnerez satisfaction et contentement à sa Ma^té, et donnerez (comme j'ay dict) bon exemple aux aultres. Mesmement par ce moyen, signamment vous déterminant d'embrasser allégrement¹ et de bonne sorte les affaires de voz Gouvernemens, ferez cesser les calumnies que dictes se semer contre vous, ensamble tous ces bruicts que scavez courrir de vous, encoires que en mon endroict je les tiens faulx et que à tort ils se dyent; ne pouvant croire que en ung coeur noble et de telle ex-

+ 1567. Mars.

1 volontiers (alacriter).

[p. 45]

⁺traction que vous estes, successeur des Seigneurs qui ont faict tant de services et en récompense d'iceulx receu tant d'honneurs des Princes de par deçà (comme chacun scait), se puist tellement oublier de son debvoir, qu'il voulsise faire faulte et rompre tant d'obligation qu'il a allendroict de sa Ma^té et de la patrye.

A cette lettre étoit ajoutée la formule suivante.

Comme le Roi, nostre Sire, au regard de la diversité du temps qui court et des nouvellités esmeus et perturbation du repos publicq, suscitée en son estat des pays par deçà, ait enchargé Madame la Ducesse de Parme etc., Régente et Gouvernante genérale pour Sa Ma^té de ces dit pays, de faire déclairer à ung chacun et signamment ceulx qui ont charges, s'ils sont délibérés de servir et s'employer ou non et comme leur sera ordonné de la part de Sa dite Ma^té, sans limitation ou restriction, je, Guillaume de Nassau, Prince d'Orenges, Conte de Nassau, Chevalier de l'Ordre, Gouverneur et Capitaine Général des Contés de Bourgoigne, Hollande et Zélande et de pays de Utrecht, et Capitaine de cinquante hommes d'armes des ordonnances de Sa Ma^té, attendu le susdit commandement d'icelle, déclare par serment que suis déterminé et prest la servir et m'employer envers et contre tous, et comme me sera ordonné de sa part, sans limitation ou restrinction. Tesmoing ceste signée de ma main. Faict en Anvers le jour de mars 1566. (Soubzescript) Guilleaume de Nassau, ay soubsigné ceste en lieu de mon serment⁽¹⁾.

+ 1567. Mars.

(1) Guill. - serment. La Gouvernante envoye une formule mème pour la signature. Elle eraignoit quelque mot équivoque, mais le Prince crut devoir agir plus ouvertement.