Archives ou correspondance inédite de la maison d'Orange-Nassau (première série). Tome IV 1572-1574

[p. 236]

† Lettre CDXLIX.
Le Prince d'Orange à ses frères. Conditions de paix; nouvelles diverses.

⁺Messieurs mes frères, le dessus est le duplicata de mes lettres du dernier jour du moys passé, et depuis je vous ay encores escript le cinq^ms(1) du présent, sans aulcun chiffre, le désastre advenu à Mons^r de S^te Aldegonde, qui a esté prins le jour précédent des ennemys à Maesland-Sluys, espérant que vous recepvrez seurement mes deulx lettres susdittes. Deulx jours après, qui estoit le sixième de ce dit moys, m'est venue la lettre de mon frère le Conte Jehan du xxij^me du passé, et ne puis sinon remercier Dieu et vous louer grandement des peines et bonnes diligences que je voys incessamment vous prenez au bien et advancement de ceste cause, et tiens pour certain que le Seigneur Dieu, continuant Sa grâce envers nous, bénira voz vertueuses actions. Je ne vous tiendray icy long propos en responce de vostre susditte lettre, me remectant entièrement à tout ce que vous trouverez estre bien faict; seulement vous diray que je suis avec bon désir d'entendre ce que sera passé aux lieux où vous estes présentement acheminez, ensemble de la volonté de l'Evesque de Colongne, et l'acheminement de la Ligue des Contes, et quelz Princes et villes se joindront à eulx. Si Gembt et Roschuysen¹ et ses semblables se vouloient entremettre de noz affaires, je le trouveray bon et me sera accroissement de plaisir, vous priant diligenter l'entreprinse aul-

+ 1573. Novembre.

(1) cinq^me. Voyez la Lettre 446.

1 Rolszhausen (?).

[p. 237]

⁺tant qu'il vous sera possible, pour les raisons que je vous ay escript, comme aussy a faict D'athenus; mandez moy le jour que le vouldrez effectuer, affin que je vous puisse secourir de quelques bateaulx. - Quant aux conditions de paix que nous vouldrions mettre en avant, je vous en ay aultrefoys escript et n'en scauroys encore présentement proposer autres, sinon que, retirant les Espaignolz et aultres estrangers hors du pays, l'on nous accorde libre exercice de la parole de Dieu selon Son commendement, avec restitution des droictz, privilèges et anciennes libertez du païs, pour ainsy faire vivre les subjects de sa Maj^té soubz l'entière obéissance d'icelle. Je ne voys aulcune apparence que les ennemys y veuillent encores entendre, estans toutes leurs actions et desseings bien esloignez de là, suyvant ce que je vous ay escript par mes dittes dernières lettres que l'ennemy s'estoit venu planter à la Haye. Il s'est de mesmes emparé de la plus part du plat païs de ce cartier, sans que j'aye moyen de le rembarrer pour le peu de forces qui me restent, ayant en Zélande de troys à quatre mil hommes, et quelques vingt-huict enseignes au Waterland. Et toutesfois, quelques pratiques que les dits ennemys desseignent, nous espérons avoyr partout mys tel ordre qu'ilz ne se pourront prévaloir d'aulcune ville, estans, grâces à Dieu, celles de ces cartiers toutes délibérées et animées aultant que jamais, et fort bien pourveues de vivres et munitions, bien que la longue guerre, les continuelles garnisons, et le peu d'argent que nous avons, les mectent quelque fois en grande peine. Mons^r de S^te Aldegonde a esté mené à la Haye, et est prisonnier du S^r Julian Roméro, Maître de Camp, duquel il se loue assez pour le gratieux traicte-

+ 1573. Novembre.

[p. 238]

⁺ment qu'il en reçoit. Le dit Romero m'a escript troys ou quatre fois des lettres plaines de courtoisies et honestes offres, ausquelles luy ay respondu en pareilz termes. Je m'efforceray pour la délivrance du dit S^r de S^te Aldegonde en tout ce que sera possible. Vous pourrez user des mesmes chiffres, comme avez faict du passé, ainsy que je croy que D'Athenus vous en a escrit, car ceulx que pensions estre perdu sont recouvertz, et n'a Aldegonde eu aulcuns chiffres près de luy au temps de son emprissonement. Il faut que je retourne encores une fois à vous parler du poinct de la paix. [Jaçoit¹] que les ennemys, vous voyans sur pied, la mectront plus chaudement en avant, encores qu'ilz n'en ayent aucune volonté, comme je m'en apperçoy icy de plus en plus; c'est toutesfois seulement pour vous endormir et cependant à mellieur loisir se fortifier et prévaloir de vous et de nous. A quoy ayez tousjours l'oeil au guet, de tant plus que cognoissez l'inconstance de ceulx ausquelz vous avez affaire, et ne laissez à poursuivre voz entreprinses le plus vifvement que pourrez. Je vous envoye joinctement ceste-cy le double d'une lettre escripte par les ennemys aux habitans de la ville de Schiedam, par laquelle vous pourrez voir par quelles pratiques ils taschent de divertir les habitans de ce païs de ceste tant juste cause. Vous priant, à ce regard, me mander par le premier au vray s'il y a apparence que vous puissiez faire quelque chose de bien brief, me trouvant assailly de tant de labeurs qu'il m'est impossible de porter ceste charge et faix plus longtemps; aussy se refroidist un chacun de plus en plus. Qui sera l'endroict etc. De Delft, ce xiii de Novembre 1573.

+ 1573. Novembre.

1 encore ou, ce qui nous semble plus probable, Je crois.