Archives ou correspondance inédite de la maison d'Orange-Nassau (première série). Supplément

19.
Le Prince d'Orange au Landgrave Guillaume de Hesse (ms. c). Affaires de France.

Monseigneur. J'ay receu hier la lettre qu'il ast pleu à vostre Ex^ce m'escrire, ensamble copie de ce que le coronel Friderich de Reiffenberge et Adam Weisen ont respondu sur les lettres de vostre Ex^ce, et ne sçay ancores rien de seur et de certain entendre par les dictes lettres, si non une grande apparence d'une dangereuse practique et émotion en France: Dieu par Sa miséricorde veuille guider tout ces choses au plus gran bien de toutte la Crestienté. Je ne peus délesser de supplier bien humblement vostre Ex^ce de tenir la main vers les aultres Princes, ausquelx avecque juste occasion ses secrets deménés sont suspectz, de rien voloir résouldre absolutement avant sçavoir quelque plus grande certitude de ses dictes affaires: aultrement

[p. 67*]

⁺il est à craindre, si les dicts princes fissiont seulement semblant de ne trouver bon ce qui se passe en France, qu'i donneriont ung piet¹ et audace aux inemis² de l'Évangiel de entreprendre quelque chose qui porroit redonder après à intérest³ de plusieurs et peult-estre à l'entier ruine de nostre religion. Je supplie vostre Ex^ce me pardoner que luy mande si ouvertement ce qui me samble en cest affaire et croire qu'il n'i ast rien qui me meult que le seul désir que la gloire de Dieu ne puisse estre recullé, ains advancé. Au surplus, Monseigneur, ne peus délesser de remercier bien humblement à icelle de tant d'honeur et faveur qu'il a pleu me monstré et le bon traictement que par les gens de vostre Ex^ce me at esté faict par le chemin, ce qui je regarderay de desservir toutte ma vie. Et sur ce baiseray bien humblement les mains de vostre Ex^ce, priant le Créateur, Monseigneur, donner à icelle en santé bonne vie et longe. De Mulenhausen⁴, ce premier de nov. 1567.

De vostre Ex^ce bien humble serviteur et frère,

Guillaume de Nassau.

+ 1567.

1 pied.

2 ennemis.

3 au dêtriment.

4 Mühlhausen: petite ville en Thuringe.