Archives ou correspondance inédite de la maison d'Orange-Nassau (première série). Supplément

[p. 199*]

68.
⁺Les Députés de Hollande et Zélande au Prince d'Orange († ms.). Sur la nomination pour le Conseil d'État.

*_** Voyez T. VI. n.^o 793^a.

Monseigneur. Les Estats ont ce matin, suyvant ce qu'avois escript hier, besoigné sur la dénomination du Conseil, et ont esté dénommez ceulx qui sont compris au billet joinct à cestes, avecq le nombre de voix y annoté. Il n'a rien servi que nous avons allégué que le S^r du Mont S^te Aldegonde par aultre résolution estoit nommé du dit Conseil, et mesmes par trois diverses lettres requis de voulloir accepter la charge, et qu'il n'y avoit aultre en la dénomination de vostre Exc. de la part de ceulx d'Hollande et Zélande que le dit S^te Aldegonde, et qu'on pouvoit bien présumer que les Estats d'Hollande et Zélande ne se contenteroient de telle élection, et que la dénomination rapportée par les Députez estoit faicte non seulement par vostre Ex^ce, mais aussy par les aultres Sig^rs estans alors en Anvers. On peult par cela remarquer le desseing de la plus part de ceulx qui ont crédict vers les députez des provinces particulières, et que leur but est de séparer ceuls d'Hollande et Zélande des aultres provinces, du moings de l'administration de la républicque, sans avoir esgard à aulcune pointe¹ ou aultre raison, laquelle leur devroit mouvoir de les mesmes prier et requérir de s'employer en semblables charges, comme estant bien principales et les plus importantes provinces, et que cela, aussy pour accroistre et entretenir l'union de concorde, est totalement requis et nécessaire. Car puisque la dénomination

+ 1577.

1 plainte (?).

[p. 200*]

⁺se faict, non par le Roy ou Gouverneur du pays, qui auroit générale puissance sur tous, mais par les provinces particulières, qui n'ont nulle supériorité l'une sur l'aultre, devroient penser que la nomination, soubz très-humble correction de vostre Ex^ce, n'en peult sortir aulcun effect, sans le consentement des provinces particulières. Ce que doibt avoir plus de lieu endroict l'Hollande et Zélande, d'aultant que tout ce que se faict, est faict en vertu de la pacification de Gand, en laquelle vostre Ex^ce avecq ceulx d'Hollande et Zelande a esté partie contractante. De sorte que plustost sembleroit que v. Ex^ce et les Estats d'Hollande et Zélande seroient fundez d'avoir la moictié dudit Conseil selon leurs choix, que seulement selon la qualité des provinces; d'aultant que ledit Conseil est principalement créé, pour avecq le Gouverneur avoir esgard à la observation de la ditte pacification de Gand. Sans que mérite considération que, selon la ditte pacification, v^re Ex^ce avecq ceulx d'Hollande et Zeelande ne sont tenus d'obéir au Gouverneur; d'aultant que ce non obstant à v^re Exc^ce appartient de pourveoir à l'entretenement de la ditte Pacification, non seulement pour ce que d'icelle dépend la paix et tranquillité commune, mais aussy pour ce que, aprez l'assamblée des Estatz-généraulx, selon la forme contenue en la ditte Pacification, v^re Ex^ce et les Estatz d'Hollande et Zélande seroient obligez de s'accommoder à ce que par icelle seroit ordonné. De sorte que v^re Ex^ce est fundée de ce pendant obvier à toutes choses préjudiciables à la ditte assemblée, comme seroit une telle préjudiciable administration de la chose publicque. Nous avons essayé de remédier à la ditte dénomination, par augmentation du nombre, pour y faire entrer le Sieur du Mont S^t Aldegonde,

+ 1577.

[p. 201*]

⁺mais les Estats, pour éviter cela, ont demeuré au nombre douze¹ conseilliers et deulx secrétaires et mesmes aussy ont assez déclaré que ledit S^t Aldegonde ou aultre ne pourroit succéder en lieu de ceuls qui aimeroyent mieulx retenir leur charges que d'accepter l'estat de conseillier; déclarant que en tel cas on feroit nouvelle élection particulier. Ceux qui sont marquez au billet sont nommez pour conseilliers, comme ayantz le plus de voix. On n'a ce matin rien faict d'aultres affaires d'importance. A tant, Monseigneur, nous recommandans très-humblement en la bonne grâce de v^re Ex^ce, prions Dieu octroyer à icelle ses haults et salutaires désirs. De Bruxelles, ce 21 de décembre 1577.

De v^re Ex^ce très-humbles et très-obéissants serviteurs,

Les Députez des Estats d'Hollande et Zélande, Par charge des dits Députez,

Jehan de Warck.

A Monsigneur Monsigneur le Prince d'Oranges Comte de Nassaw.

+ 1577.

1 d'onze (?).