Logo DBNL
Werken. Deel 1: Gedichten (1875)

Werken. Deel 1: Gedichten

(1875)– Hadewijch–rechtenstatus Auteursrechtvrij

Vorige Volgende
tekstkritische noten

VIII

 
God bevele ic uwe sinne
 
Dat hi u minne doe daer inne
 
Ende lere sinen wille leven
 
Ende rechte waerheit der waerheit geven
 
Ende sonder veynsen leven in trouwen
 
Ende moeten uwe leven bescouwen
 
Nu siet dat ghi u haest ter doghet
 
Met al dat ghi gheleisten moeget
 
Ende allen den genen dient die minnen
10.
Omme datse u hulpen de weghen kinnen
 
Die ter hoochster minnen behoren
 
Dien god met werken hadde vercoren
 
Dien sijns vader wille wrachten
 
Ende des heilechs geest enege gedachte
 
Een enech wille was al hare werc
 
Met hem wilt ende wert enech ende sterc
 
Ende gevet in minnen al uwe gedachte
 
Dien soeten god die u gewrachte
 
Die u dies gheholpen hevet
20.
Dat ghi bi den genen levet
 
Die hoge minne te gode draghen
 
Ende u in letteren sijns gewaghen
 
Ende u wisen die hoochste doget
 
Die ghi gherne leren moget
 
Ende blide moget sijn van dien gerede
 
Dat ghi ter minnen selt hebben geleide
 
Alst yser heet es salment slaen
 
Hier bi seldi u haesten zaen
 
Die wile dat ghi hebbet uwe ioget
30.
Ende ghi doghede vercrigen moget
 
Maer waerdi traghe ende lat
 
Ende ghi niet en vordert dat
 
Dat ic u wille ende hebbe bevolen
 
So soudi noch sere dolen
 
Al uwe vriende souden u begeven
 
Ghi soudet in groter scaden leven
 
Maer des en es u ghene noot
 
Onse god die u gebod
 
Hi moete u helpen ende staen in staden
40.
Van al dien dies ghi sijt verladen
 
Ende laet u gheen dinc verladen wesen
 
So seldi met minnen alles genesen
 
Sijt oetmoedech ende verduldech
 
Bider trouwen die ghi gode sijt sculdech
 
Ende begert gerne te sine altoos
 
Ellendech ende vriendeloes
 
Omme minnen ere tote u god troest
 
Ende selve vander ellende verloost
 
Doet di iet men dies suldi u scamen
50.
God make u na sijn getamen.

Vorige Volgende