Goddelicke lof-sanghen

[p. *IIr]

Aen den eer-weerdighsten heere Iacobo Boonen seste bischop tot Ghendt,

Grave van Everghem, Mendonck, Sprendonck, &c. Raedt van haerlieder Door-luchtighste Hoogheden.

Eer-weerdighsten Heere. Gelijck het soude wesen on-moghelijck, dat tusschen de bijtende couwe van eenen vriesenden Winter, de blommekens hun inghemaelde schoonigheyd souden doen wintelen uytter aerde, ten waere dat Phoebus door zijne lieffelijcke straelen die quaeme besielen, ende dat Zephyrus met een soet-coele vochtigheyd die gunde te beademen, waer naer vertrotsende de Noordsche snijdende winden, sietmen die op-cruypen ende lyfelick doorvringhen de vaste sloten met de door-vrosen bolle-wercken die hun hadden ghehouden ten onder; Alsoo oock dese Lof-sanghen, tot noch toe ghedoken onder de dicke schollen van eenen Winter vol bevreesder achter-dincken, en hebben 'thooft niet derven uytsteken, ten waere dat uw's gheests gheluckighen in-vloed, en-

[p. *IIv]

de den claeren glans uwer in-gheboren beleeftheydt die hadden geweerdight als eenen Phoebus te beschijnen, ende als eenen Zephyrus te verquicken, soo veel vermoghende dat van nu-af gheslist sijn de stuere buyen van heure vyanden, ende teenemael op-gheclaert de mistighe smuycken vande lasteraers die de selve met een hooftschuddinghe ende gherumpelde wind-brauwen als onnutte saecken sochten te vercleynen omme hun 'taenschijn des Weerelts te beletten. Ontfanght die dan willigh onder de grootdaedigheyd van uwen Naeme, den welcken zy hunnen op-ganck, en allen was-dom sijn schuldigh toe-te-eyghenen, ende ick alle dienstbaerheyd te bewijsen. Ontfanght die vanden ghenen die de selve aendient als Apelles dede zijn schilderijen, altijd vol-veerdigh te vermeerderen, vol-veerdigh te veranderen al 'tghene dijn onverghelijckelijck vernuft sal bevinden te behooren, Bidde voorts die met sulcke aenghenaemheydt te aenveerden als ick ze ben hanghende met alder-oidmoed aen de groodheyd uwer weldaeden die my altijd sullen verbinden te blijven

Eer-weerdighsten Heere

Vwer Eer-weerdigheyds alder oidmoedighsten Dienaer

I. de Harduyn.