Const-thoonende juweel

Bij de loflijcke stadt Haerlem, ten versoecke van Trou moet blijcken, in't licht gebracht

Heuch-reden van Rhetorica uyt-ghesproken op het Speel-tooneel.

O tijt ghevleugelden tijt, o tijt die snel vluchtigh doorlijt,
O grijsen ouden tyt o tyt van spelen en singen,
O tijt van vreucht en rouw, o tyt van vreden twist en strijt
O tijt slibberigen tyt o tyt vol veranderingen,
O kostelycken ong'achten tyt o tyt verslinder alder dingen,
O tijt hoe langen tijt heb ick verlangt met menich geest
na desen tijt, den tyt om vredich te volbringen
dees myn konst-vreuchdige nutte stichtbare Feest,
O noyt geen tijt als desen tyt my so welcom geweest.