Const-thoonende juweel
(1607)–Zacharias Heyns–
AuteursrechtvrijBij de loflijcke stadt Haerlem, ten versoecke van Trou moet blijcken, in't licht gebracht
[Folio Tt1v]
| |
Refereyn.
O onsalighe werelt, hoe gady dus doolen,
Hoe wandelt ghy verkeert de oprecht paden,
Hoe wijct ghy van die, hoe lecht ghy verschoolen,
Hoe vertreet ghy u salicheyt door u boose daden,
O aertsche wormen, wie heeft u gaen raden?
S'werelts rijcdom, looflijc by u te vermeeren,
Dien by u te houden, en noch meer te laden,
Ga naar margenoot+Hoort ghy Christi woorden niet, moghen u die niet leeren?
Doen hy van ons scheyden, en voor al ginc begeeren
vlytelijck uwen armen broeder te versoeten
met aelmisse te doen, daer meed' tot hem keeren,
Hebdy Christum lief soo laet u dat ontmoeten,
Houdy hem voor 'thooft, soo voldoet dan u boeten
aenden Armen, t'welc aen ons wert ghebeden,
Laet den Mammon in u herten soo niet wroeten,
Op dat wy 'tsien moghen, ende alle menschen meden,
Lieft ghy Christum het hooft, soo troost dan oock zijn leden.
Hoe veel menschen zijnder die Christum beminnen
metten Priester ende Levijt die altijt bidden en lesen,
Doch weynich bystant salmen by haer vinnen,
Als bleec aen die van Ierus'lem, op Iericho most wesen,
Is ghevallen onder den moorders, die God niet vreesen,
Trocken uyt zij clederen, gaven hem 'tlijf vol wonden,
Doen sy hem saghen soo desolaet in desen
totter doot toe ghequetst, berooft, soo zijn sy op die stonden
hem voorby gegaen, gheen bystant wert by heur ghevonden
Ga naar margenoot+Maer een Samaritaen die ging hem ontfermen,
Spranck van zijn beest, die heeft hem verbonden,
Gaff hem olie en wijn, en wilde hem dus beschermen,
Doen betoonde hy hier zijn lieft totten armen,
Laet de liefde in u oock alsoe treden
als desen Samaritaen, wat baet an'dre termen
off veel Schriftuers verhaelt? maer doet als dees deden,
Lieft ghy Christum het hooft, soo troost dan oock zijn leden.
| |
[Folio Tt2r]
| |
Toont dan u liefde, hebdy Christum lieff
mettet Weeuken, de welcke hadde ingheleyt
twee myten, in Gods kist, tot des armen gherieff,
Waer van Christus heerlick haer faem uytspreyt:
Dese weduwe die dit doet (alsoo hy seyt)
Die heeft het meesten alhier ghegheven,
Want dat zy dit dee' was haer mildicheyt,
Ende quam van haer nootdruft, daer zy most af leven,
Oock haer heele voetsel daer beneven:
Iae al wat zy hadde was daer ghebrocht,
Waer van zy boven alle rijcken werde verheven,
Die haer overschodt deelden, nae dat zijt hadden gedocht,
Maer aen gheen oprechte liefde waren zy gheknocht,
Hoe wel zy daer in bruycten goede zeden:
Maer de liefd' was in haer soe niet ghewrocht
ghelijck in dees wedue, die Christus soe gaet verbreden,
Lieft ghy Christum het hooft, zoe troost dan oock zijn leden.
Prince.
Elck doe doch caritaet, en u milde hant open,
Dat ghy Christelijcke broeders sijt in't beiaghen,
Mildelick wilt wesen voor die zijn versopen,
Hier voor 'tOude man-huys, daer men suchten en claghen,
legt doch vrielick in, dattet Godt mach behagen:
Misschien oft jemant hier noch selfs mocht verteren,
Dus ontfermt u, wilt u niet versaghen
In bermherticheyt te doen, wilt u vlytich weren:
Ghelijck den Samaritaen, diet hem ginck deren,
En in't gheven wilt oock van ghelijck doen,
Als 'tWeeuken deed', wilt u soo regeren,
Dus leght mildelick in, dat den armen mach voen,
Want 'tis Goods kist, wilt u hier nae spoen:
Dus niet saligher en moecht ghy' tbesteden
u offerhanden, die u zullen van d'Hels pijn behoen,
Toont u doch dan vlytich, soe raect ghy in vreden,
Lieft ghy Christum het hooft, zoe troost dan oock zijn leden.
|
|