Briefwisseling. Deel 3: 1640-1644

2422. Aan J.A. Bannius. (K.A.)

Quam vana suspicione dubitaveris imponere tibi Gallos destinasse, tandem comperis. Serio nimirum hoc agit omnium literarum, artium atque artificum proxeneta Mersennus, ut, collatis cantionibus tuis³⁾ et Gallorum, animi auditorum arguant, utrae majorem in se impetum faciant. Quid ex theoriae fundamentis ipse praestiteris, tute nosti; ut Boëssettius⁴⁾ eosdem versiculos casu vel consuetudine expresserit, hic habes, subjunctis alijs mere tristibus ac luctuosis, ut, si libet, alterum hoc vestri periculum inter vos faciatis nobilissimi athletae. Gallicum enim exemplar mehercule ne fucum rursus extimescas; jamnunc in potestate mea est, uno cum μινυρισμῷ, cuius rei fatendum est mortales illos longe peritissimos esse, natura simul atque habitu. Vellem primus omnium artifex Varennius⁵⁾ non te fefellisset. Expertus esses, quam volubili ac suavi severitate gutturi imperent, auribus omnium et exquisitissimae doctorum attentioni satisfaciant. Expectas tua de cantione quid senserim; ego vero magis expecto, ut me edoceas, ad quam amussim, quibus ad scientiam factis natisve vocabulis disserere me de omni modulatione deceat. Compendium, inquam, quod promiseras⁶⁾, avide expecto, mox animi mei sensum congruis verbis ac sententijs et bona item fide expositurus.

3) Zie No. 2370.

4) Antoine Boësset (1585-1646?) was als intendant der muziek, later ook als raad en hofmeester, verbonden aan het Fransche hof. Hij heeft vele liederen uitgegeven, de muziek voor vele balletten gecomponeerd en ook een werk over de geschiedenis en de theorie der muziek geschreven.

5) Zie No. 2294 en 2299.

6) Zie No. 2370.

[p. 51]

Superest, ut mirabili puellae Mariae Schurmannae exemplar horum omnium meo nomine et Mersenni transmittas, instructus amanuensi musico apprime sedulo atque eleganti. Iubet hoc reverendus pater, et non nihil causae est, cur ad ipsam virginem scribere detrecto mea manu, frustra id expertus aliquoties, postquam sibi nescio quem de viduitate mea scrupulum injecit, ridiculum hercule et ineptum. Quod me suspicantem, cum non rescriberet, amici insuper cum risu monuere. Musicae novos characteres nuper a Mersenno mihi datos ad eandem virginem, si placet, perferendos curabis; mihi nondum tanti fuere, ut exscribendos dederim. Publici aliquando juris ista sub currente praelo fient. Maldeghem, 26 Junij 1640.

Si quid rescribis, domi meae et soli cognatae Catharinae Zueriae¹⁾ commendari tute poterit.

1) Zie II, blz. 251.